Vawiin chawhma dar 11:00 khan Govt. High School Baktawnga RMSA Building, cheng Nuai sawmthum Sing riat leh sang khat (30,81,000) senga sak chu Pu K. Lianzuala, MLA Tuikum Constituency bialtu chuan a hawng a. He hunah hian Kum 2012 HSLC Exam-a Govt. High School Baktawng-in result tha tak an neih chu lawmna hun hman nghal a ni.

Building thar hawnna leh Result lawmna inkhawm hi Pu K. Vanzama, Teacher Govt. High School Baktawng chuan a kaihruai a. Pu K. Lianzuala, MLA chuan khuallian niin a hmanpui a, Pu Zolawma DEO Serchhip pawhin khualzahawm niin a telpui bawk.

Khuallian Pu K. Lianzuala chuan hetiang building tha tak an nei hi Baktawng khawtlang hian an phu ve renga a hriat  thu sawiin, hetiang building  tha tak an neih theihna chhan chu sawrkarin zirna a ngaih pawimawh vang a ni a ti a. RMSA School hi Mizoram hmun hrang hrangah sak a ni a, India ram pumah Mizoram hi RMSA Scheme hmang tha ber te zinga mi kan nih thu a sawi a ni. Zirna hi mihring puitlinga min siamtu a nih avang hian sawrkar hian a ngai pawimawh tak zet a ni a ti. Mizoram hi India ramah ziak leh chhiar thiam tam lamah kan sang em em a, Serchhip District phei chu India ram pum puiah a sang ber kanni a, chhuanawm a tih zia a sawi bawk a ni. Chutih lain lehkha thiam tam lama san ringawt hi a tawk lova, thiamna tak tak neih a tul thu a sawi uar hle bawk. Central leh Civil Service-a Mizo thlaite a tam thei ang ber lut thei tura tan lak a ngaih pawimawh thu a sawi tel bawk ani.

Khuallian chuan Mizoram hi tun dinhmunah chuan a la intodelh lo hle a, tunlaiin eirawngbawlna Gas-ah harsatna kan tawk mek a, heng te hi Politics-a inbeih nana hman chi a ni lo tiin July thla lamah chuan a ziaawm beisei a nih thu a sawi bawk. Sawrkar Flagship Program NLUP kan dawnah rinawm taka kan tih a tul thu sawiin, NLUP sem tur cheng Vaibelchhe 400 dawn dah a ni a ti a, nikum lamah Plan Budget-ah cheng Vaibelchhe 1700 vel dah anih lain kuminah chuan cheng vaibelchhe 2300 ah a pung chho dawn a ni a ti bawk.

Pu H. Tawnvela, Work Manager chuan Technical report pein, he building hi RMSA sum hmanga sak a ni a, Building-ah hian room paruk(6), 15 feet leh 18 feet a zau a awm a ni. He building hi a chhawnga sak niin a chhawng chung zawkah hian room pahnih awmin, a chhawng hnuai zawkah hian room pali a awm a. Kum 2011 March thla atanga sak tan niin vawiin hian hawn theihin peih a ni ta a, he building sak nan hian Rs. 30,81,000 sen a nih thu a sawi bawk a ni.

Govt. High School Baktawng hi kum 1986 a din a ni a, HSLC Exam vawi 26 an hmachhawn  tawh a, he School atang hian mi 200  chuangin HSLC passed chhuak tawh in, Pass kim vek kum hi tum 4 an nei tawh bawk a ni. Kum 2012 HSLC Exam-ah khan mi 17 in Exam beiin an vaiin an passed vek a, Distinction-ah mi pakhat, First Division-ah mi pali, Second Division-ah mi pakua leh Third Division-ah mi pathum in an pass a, mi 12 in Letter Mark an hmu bawk a ni.Khuallian chuan Building thar lawm nan leh Result lawmpui nan hian thilpek a hlan nghal bawk.