Nimin chawhnu khan Tourism Minister Pu S. Hiato’n Hnahlan Tourist Lodge a hawng a, hawna programme ah hian Minister hi Parliamentary Secretary Pu H. Zothangliana leh bialtu MLA Pu T.T Zothansanga ten an tawiawm a ni. Lodge hawna inkhawm hi Pi B Sairengpuii, Secretary Tourism Department in a kaihruai a, khawtlang hruaitute leh khaw mipui thahnem tak an tel bawk a ni.

Pu S. Hiato chuan Hnahlan chu khaw hmingthang an ni tiin, an taimakna, thawhrimna leh an kut hnathawh uar avangten Zoram pumah hriat leh ngaihsan an hlawh thu a sawi a. Hnahlan in Zo Wine (Zawlaidi) avanga hlawhtlinna an nei chu fakawm a tih thu sawiin Sorkarin a theih ang anga Hnahlan tan theihtawp a chhuah ang a ti. Wine quality tun aia tih that kawngah te leh Mizoram pawn a thawnchhuah anih theih nan a hma lakte chu Sorkarin a ngaituah mek a ni a ti bawk. Minister hian Tourist Lodge sak nan hmun rem tak mai khawtlang in an pek avangin an chhunga lawmthu a sawi a. Tourism atanga sum lut chu Sorkar chhuahin a hlawkpui lova, ngaihtuahna leh ruahmanna tha siam chuan a chawr bertu tur chu mipui lam anih theih thu a sawi. Minister hian Sorkar nen khawtlang hruaitu, tlawmngai pawl hruaitu leh mipui an tan ho hian hmasawnna a kal chak thu sawiin khawtlang mipuite chu Sorkar tawiawmtu tha ni turin a chah a. Inlak hranna rilru chu a that loh thu sawiin Pu Hiato chuan Chief Minister Pu Lal Thanhawla’n Mizo hnam hrang hrangte a khaikhawm that thu a sawi a. Mizo hnam hrang hrang ten rualkhai leh rualrem taka hmasawnna an neih theuh theih nan Sorkar in hma a la zel a, inuanna boruak tha a awm  hian khawtlang leh mipui tan malsawnna a thlen thin thu a sawi.

Parliamentary Secretary Pu H. Zothangliana pawhin he hunah hian thusawiin Tourist Lodge hawn tak hi Department ta chhauh ni lovin a khaw mipuite chu neitu rilru pu a, thianghlim leh tangkai taka hman a nih theih nan leh zahawm taka vawn anih theih nan theitawp chhuah pui a, tan lak pui turin a sawn a ni. Bialtu MLA Pu T.T Zothansanga chuan Hnahlan chu khaw entawntlak a ni a, thalai ten kut hnathawh an ngaisang a, thalai hna neilo vak mai mai hmuh tur an awm loh avangin nasa takin an intodelh a ni a ti.

Hawna inkhawm ah hian PWD Senior EE Pu K.L Nghinglova’n Technical Report a pe a. A Technical Report in a tarlan dan chuan Hnahlan Tourist Lodge hawn thar tak ah hian Dormitory Block leh Tourist Facility bakah khualzin thlenna Cottage pali (room pariat, khum pahnih vek) a awm a. Dormitory Block leh Tourist Facility zau zawng hi square metre 347 niin a sak nan leh a hmun hma te cheibawl nan hian Rs. 70,41,000 senral a ni a, a satu contractor chu F. Vanlalsiama a ni. Cottage pali belhkhawm zau zawng chu square metre 325 niin a sak nan leh a hmun hma te cheibawl nan hian Rs. 61,85,000 sen a ni a, a satu contractor chu C. Zama a ni.