Sorkar laipuia Ministry of Textiles atanga lo kal te chuan ni 30.6.2012 (Inrinni) khan State Guest House Conference Hall-ah Mizoram Officials te nen meeting pawimawh tak an nei a. Central team te hi an hruaitu Jt. Secretary, Ministry of Textiles Pu Sujit Gulati hovin mi 14 an lo kal a, Mizoram sorkar mi pawimawhte hi Chief Secretary Pu Vanhela Pachuau-in a ho thung a ni.
Ministry of Textiles Jt. Secretary Pu Sujit Gulati chuan sorkar laipuiin rampumah science thiamna hmanga siam ‘technical textiles’ chi hnih - geotextiles leh agrotextiles - hman uar zawk a nih theih nana scheme thar ‘Scheme for Growth and Development of Technical Textiles’ (SGDTT) a duan chungchang a sawifiah a. Mizoram an lo kal hmain Assam, Meghalaya, Tripura leh Manipur te an tlawh thu sawiin Pu Gulati chuan Geotextiles leh Agrotextiles hman uar a nih theih nan a bultanna senso zawng zawng chu sorkar laipuiin a rawn tum vek dawn a, state tinah he scheme thar kengkawhtu tur Nodal Officer ruat a tul thu a sawi bawk. Hmarchhak bial bik tan 12th Five Year Plan-ah Geotextiles atan cheng vaibelchhe 500 (kum tin cheng vaibelchhe 100) leh Agrotextiles hman lar a nih theih nan cheng vaibelchhe 55 dah a nih thu a sawi a. ‘Technical Textiles’ te chu hlawm hrang hrang 13-ah then a nih thu sawiin Pu Gulati chuan heng siamna kawngah pawh India chu thang chak (11%) leh hmang uar ber pawl a ni tan mek a ni, a ti. Ministry of Textiles hnuaiah technical textiles siamna leh enchhinna (experiment & demonstration) hmun ‘Centre of Excellence’ 8 lai - Mumbai, Ahmedabad, Ghaziabad, Coimbatore leh Thane-ah te an neih thu a sawi a, Mizoram atangin official team ten a hmunah enfiaha tlawh turin a sawm nghal bawk a ni.
Mizoram Chief Secreatry Pu Vanhela Pachuau chuan Ministry aiawha lo kalte lawmna thu a sawi a. Sorkar laipui hmalakna chu fakin Mizoram sorkarin theihtawpa a thlawp tur thu a hrilh a. State Officials dangte nen inrawnin Chief Secretary chuan Geotextiles Nodal Officer atan Chief Engineer, PWD (Roads Division) leh Agrotextiles Nodal Officer atan Director, Horticulture te chu a ruat nghal a ni. He scheme kaihhnawih department officials leh hnathawkte chu technical textiles chungchang zirtir tul a tih thu sawiin Chief Secretary chuan Mizoram chhungah Demonstration Centre pawh din thuai a rawt bawk.
‘Technical Textiles’ tia hriat lar hi science thiamna hmanga tangkaina bik neia siam an ni a. ‘Geotextiles’ hi kawngpui siamna leh chei that nan te, leimin tur ven nan te, tuizem leh tuichhunchhuah venhim nan leh lei chunglang tha luang ral tur ven nan hman thin a ni a. ‘Agrotextiles’ te hi hnim, thlai leh thingkung te ni sa, ruahtui, thli leh thlai ei chhe thei rannung laka ven nana hman a ni thung a. He scheme bultan nan Ministry of Textiles chuan zirtir turin mithiam a rawn tir ang a, senso leh mamawh zawng zawng a rawn tum dawn a ni. Kumina rampum Budget pharh a nih khan Prime Minister Pu Manmohan Singh chuan he ‘Scheme for Growth and Development of Technical Textiles’ (SGDTT) hi a puang a, ramchhungah technical textiles siam leh hman tih lar leh uar zawk tura ruahman a ni. Sorkar laipui chuan nakum January ni 17-19 chhung khian New Delhi-ah ‘TECHNOTEX-2013’ a huaihawt dawn a, hetah hian ramchhung leh pawn atangin technical textiles siamtu leh sumdawng thin company lian tam tak te an intawk khawm dawn a ni.
