PHE Department, Serchhip WATSAN Division chuan vawiin chawhma dar 11:00 khan Pu Vanlalzawma, MLA Aizawl West III bialtu in Model Village a siam tura a thlan Baktawngah Faina kawnga inzirtirna Sanitation/Cleanliness Awareness beihpui an thlak.

Baktawng Tlangnuam Community Hall-a he hun hmanah hian Er. Lalhruaia Sr. EE PHE Serchhip Watsan Division chu Khuallian a ni a, thusawiin Baktawng chu khawfai tak niin kum 2007 a India ram khawfai chawimawina lo dawng tawh an nih avanga Faina beihpui thlak leh hi thil tul lo ani bik lova, khaw fai an nihna vawng nung zel a, midangte tana entawn tlak ni zel zawk turin a chah a ni.

Kum 1954 ah India ram Faina chungchang inzirtirna hi kalpui tan a ni a, nikuma atanga Swachh Bharat kalpui a nih atang khan Nodal Department PHE pawhin theihtawpa hma an la chhunzawm zel a ni a ti a, PHE Department hian Faina ringawt ni lovin thianghlimna a keng tela, Tuallai leh khawchhungmai faina mai bakah nitina kan khawsakna hmun leh kan inthiarna te a thianghlim em tih hi kan ngaipawimawh a ni a ti. Naupangte pawh tun atanga an rilrua faina leh thianghlimna a intuh ngheh tawh chuan an fate lehzelah pawh a in tuh dawn avangin tuna naupangte thinlungah hian faina hi kan tuh a tul a ni ti bawk.

Inkhawmah hian Baktawng Tlangnuam VCP Pu Ngaihsanga leh Baktawng Vengpui VCP Pu Zalawma ten thu an sawi a, Pu Ngaihsanga, VCP Tlangnuam chuan Faina hi kan thinlungah a bet tlat tawh a ni a ti a, chhungkaw tinin pawisa thawhkhawmin bawlhhlawh paihna turin motor an hman thin thu a sawi a, khual tha thlen dawn avang chauha fai ni lovin, englai pawhin khual tha thleng thei turin an fai reng thin thu a sawi.

He hun puala inkhawm buatsaih hi Pu Ronghaka, SDO, PHED, Tlungvel WATSAN Sub-Division chuan kaihruaiin Faina beihpui thlak anih chhan leh India Sawrkarin faina kawnga hma a lo lak tawh dan hrang hrang te a tarlang a, Baktawng khua chu faina kawnga hma an lo lak tawhna ah fakawm a tih thu leh tha thlah miah lova khaw dangte entawn tura tan la sauh sauh turin a kalkhawmte a fuih a ni.

Vawiina Sanitation/Cleanliness Campaign ah hian mipuite leh School naupangte an kal tha hle a, Serchhip leh Tlungvel atangin PHED thawktute an kal bawk a ni.