Vawiin khan I & PR Conference Hall-ah TB enkawlna chungchanga 3rd Quarter Review Meeting chu Dr. K. Ropari, Principal Director, Health & FW Department hova neih a ni a. He meeting-ah hian district hrang hrang atangin District TB Officers leh Medical Officers te an tel a ni.
Dr. K. Ropari, Principal Director chuan TB enkawlna Revised National TB Control Programme (RNTCP) hnuaia Nikshay entry-ah India ram pumah Mizoram chu a ti tha ber pawl a nih avangin lawmthu a sawi a. TB leh HIV vei kawp chungchangah, HIV hrik hi tihlum thei lo mah ila, HIV vei ten TB natna hi an thihpui tam ber anih avangin, TB vei ten HIV test an neih ngei a pawimawh thu leh HIV vei te pawhin TB an vei leh vei loh test ngei ngaihpawimawh a tul thu a sawi.
Kumin January – September 2015 chhunga Mizorama TB enkawlna chungchang hetiang hian a report.
1. TB vei nia rinhlelh exam zawng zawng - 7595
2. TB vei hmuhchhuah zat - 1597
3. TB vanga boral - 25
4. TB HIV vei kawp hmuhchhuah zat - 134
5. MDR-TB vei hmuhchhuah - 36
6. TB vei enkawl dam - 82%
Meeting hi Dr. Vanlalfela, State TB Officer in a kaihruai a. Dr. Gautam Borgohain, WHO Consultant leh Dr. K. Lalbiakzuala, Mission Director (NHM) te pawhin TB leh MDR-TB vei nia rinhlelh ten an vei ngei leh vei ngei loh test-na tur Culture & DST Laboratory, Falkawna sak mek a nih thu te, meizu mi zawng zawng ten TB an vei leh vei loh finfiahna tura thawh ho a ngaih thu te, Financial Management System pawimawhna te an sawi a ni.
Dr. Zosangliani, Asst Programme Officer, STCS leh Dr. Albert Lalhminghlua, Medical Officer, DR-TB Centre ten Power point presentation hmangin district tina case hmuhchhuah leh enkawl te, MDR-TB vei enkawlna chungchangah presentation an pe a, he Review Meeting-ah hian July – Sept 2015 chhunga TB vei hmuhchhuah chungchang chhui bingna neih a ni a. District hrang hrang atanga report-a alandanin TB vei hmuhchhuah leh enkawl mi 518 an awm a, khaka TB hrik awm hmuhchhuah mi 120, enkawl dam 82% awmin, HIV leh TB vei kawp hmuhchhuah mi 51 an awm a, Naupang TB vei enkawl lai 72 an awm bakah MDR-TB vei hmuhchhuah thar mi 12 an awm bawk.
