Baktawng Tlangnuam-in NLUP hnuaia khaw titha ber nihna Sekhum khua nena an dawn chu vawiin khan ruai nen a khaw nawtin Chhuanthar Stadium-ah an lawm a. Chief Minister Pu Lal Thanhawla chu khuallian a ni.

Chief Minister chuan Baktawng Tlangnuam mipuite chu inthununna nei tha, inlungrual leh rim taka hnathawk thin an nih avanga lawmman pakhatna dawng thei an ni a ti a, hetiang lawmman an dawng hi a ropui a, midangte entawn tlaka an awm thei hi a lawmawm takzet a ni a ti. An khaw chhunga hmasawnna hnathawh tamtakte chu anmahni thawhrah ani chu a ropui hle a ni a ti bawk.

Chief Minister chuan kut hnathawh hi eizawnna ropui, eizawnna zahawm ber a ni tiin mitin thawh theih a ni a ti a. Chuvangin kan ram hi a leilung faten Pathian duhdana rim tak leh taima taka cheibawl hi kan tihtur a ni a ti. Baktawng Tlangnuam mipuite pawhin rinawmna, dikna leh taimakna nena hna an thawh avanga hetiang lawmman dawng hi an ni a. NLUP hi kut hnathawktu mi rethei leh chhumchhiaten leirem an raha, khaweng an hmuh theihna tura tih a ni a, mi hausa leh miliante tan a ni lo a ti. A sawihnawmtute hi mi retheite leh chhumchhiate changkan chhoh ve hlau tu, leirem an raha khaweng an hmuh ve duhsak lo tu an ni a, chutiang mi chu sorkar leh mipuite hmelma an ni tih mipuite chuan hre turin a chah a ni.

Chief Minister chuan kut hnathawktute thawh that man chu sorkar chuan pek a phal a ni tiin Baktawng Tlangnuamin an hnthawh nana power supply tha an mamawh tihpuitlin nan Generator 100 KVA-a chak, Rs.7.70 lakhs man chu pek an nih tawh thu a sawi a. Hemi atana sum la hman bang Rs.1.83 lakhs khawtlang tan a pe nghal bawk a ni. Hemi bakah hian school tana mamawh an sawi Midday Meal leh High School Aided Status atana dah tur chungchang chu Chief Minister chuan Education Department-in dan a neih anga endikin, danin a phal chuan pek hmasakah tihsak an ni ang a ti.

Lawmna inkhawmah hian NLUP Nodal Minister Pu H.Liansailova, Finance Minister chuan Baktawng Tlangnuam hlawhtlinna hi Mizoram pum tan a ni tiin midangte tana entawn tlak khawpa hna an thawk chu an chhuanawm hle a ni a ti. Bialtu MLA Pu K.Lianzuala, Chairman KVI, Pu KS Thanga, Parliamentary Secretary leh Pu R.Selthuama, Chairman, NLUP Implementing Board-te pawhin thu an sawi bawk a ni.

Lawmna inkhawm hi Pu K.Hunliannghaka, VCP-in a kaihruai a, Serchhip District DC Pi Juhi Mukherjee pawhin thu a sawi bawk.