No.1296/2020-2020

Dated Serchhip, the 22nd May, 2020: Vawiin hian Baktawng Venglai Presbyterian kohhran te chuan Serchhip District-a quarantine facility a khunghran mek te tan pawisa fai Rs. 10000 leh chawhmeh chi hrang hrang thahnem tak Serchhip Bawrhsap Dr. Lalzirmawia Chhangte, IAS hnenah an hlan.

Thilpek inhlanna hun tawite, DC Office tuala neihah Dr. Lalzirmawia Chhangte, IAS chuan, Baktawng Venglai Presbyterian Kohhran chungah lawmthu sawiin, an thiltih chu chhuanawm leh entawn tlak tak a nih thu a sawi a, a tul huna kohhranin sawrkar a tanpuia a thawhpui thin chu chhinchhiah reng tlak thil tha a ni, a ti. An thil pekte chu a tangkai thei ang bera khunghran mekte tana hman a nih tur thu a hrilh nghal bawk a ni. Bawrhsap hi Addl. DC Pu HD Lalpekmawia, MCS leh Pi C. Lalduhzuali, SDO Sadar te leh DC Office a thawktu thahnem takin an tawiawm a ni.

Baktawng Venglai Kohhran te hian Pickup Truck hmangin an thilpek te an rawn phura, an kohhran Secretary Upa K. Vanzama chuan hetianga thil an pek chhan tlangpui sawiin, khunghran mekah hian Baktawng mi leh sa te an lo awm ve bakah, kohhran chuan theih ang tawka he hripui laka kan him theih nana sawrkar tanpuia, tihchak tha kan ti a ni, a ti a. An thil rawn ken tlangpuite sawiin; Sapthei hnah, Oil Palm zik, Balhla, Thingthupui, Phuihnam, Antam leh Maian bakah pawisa fai cheng singkhat a ni.

An bialtu Pastor Benny Lalmawia leh a nupui Pi Rebecca Zairemmawii, Upa K. Vanzama, Upa C. Tawnluia, Upa Hmasawnzela leh lirthei khalhtu Pu C. Lalchangliana te an kohhran aiawh hian an rawn kal a ni.

Tunah hian Serchhip District mi leh sa, state pawn atanga rawn haw, dan anga khunghran mek te hi 58 an ni mek a, Tourist Lodge, P&E Rest House leh Eklavya Residential School Hostel ah te dah mek an ni.