February ni 23, 2012-a Village Council leh Local Council inthlanna atana inbuatsaihna chu District zawng zawngah tluang takin a kal mek zel a. Kum 2009 hma lama Village Council inthlana Seat awm zat mila Ballot Paper siam thin leh Candidate-ten anmahni puala bawm (box) an neih thin chu kum 2009 V/C Inthlanpui atang kha chuan tihtawp a ni a. Ballot paper pakhat (Common Ballot Paper) leh Ballot Box pakhat (Common Ballot Box) hman a ni ta a. Hei hi tlema siamthain kum 2012 Village Council leh Local Council Inthlana Ballot Paper awmdan tur tlangpui leh Vote chhiardan tur chu hetiang hi a ni ang:

1 Ballot Paper chu a var a ni ang a, Xerox Paper A4 emaw Legal Size hman a ni ang.

2. Voter-ten awlsam zawka an vote duhte hming an hmuh zung zung theih nan alphabetical order-in Political Party-te chu dah an ni a. A hmasa berah Recognised Political Party-te an awm ang a, a dawtah Recognised Political Party nilo an awm ang a, chumi hnuah Independent Candidate ten an dawt ang. Party pakhat atanga candidate-te chu a hlawm a dahin an hming alphabetical order-in rem a ni ang a, Party hrang hranga Candidate zawng zawngte Sl.No erawh hi chu a inzawm vek ang. Candidate-te symbol theuh chu an hming zawn ah a awm tho bawk ang. (Sample Ballot Paper thil tel a ni).

3. Vote thih theih dan chu hetiang hi a ni ang: i) Ballot Paper-ah chhutna hnuhma (arrow cross mark) pakhat mah a awm lohin

ii) Candidate thlan tur zat (No. of seats to be elected) aia tam chhutna hnuhma a awmin

iii) Vote chhutna atana tih hmanrua (arrow cross mark)-a vote chhut a nih lohin.

iv) Tunge a vote tih hriat theih loh khawpa candidate-te daidanna rin chu a mark chanve chiaha chhut a nihin

v) Ballot Paper hnung lama chhut a nihin.

4. Vote nun theih dan chu hetiang hi a ni ang: i) Candidate thlan tur zat (No. of seats to be elected) chiah a chhutna hnuhma a awm in

ii) Candidate thlan tur zat (No. of seats to be elected) aia tlemah chhutna hnuhma a awm in

iii) Vote chhut chu candidate-te leh midang daidanna rin (line)-ah lang ta se, a chhutna (mark) lan tamna lam chu vote nung lam a ni ang

iv) Candidate daidanna chhunga chhut a nih phawt chuan (candidate hming chungah pawh) vawikhat aia tam chhut pawh ni se vote nung a ni ang v) Chhut fiah lo riai a nih pawhin a nung ang.

vi) Chhut (mark) sir khat lai emaw thenkhat lai emaw chauh pawh lang se a nung ang.

vii) Ballot Paper thleh avanga voter-in a chhutdan pakhata a landan dik si (original mark), candidate dang hming emaw symbol-ah emaw a landan dik lova thla a kaiin original mark lanna chu a nung ang. Entirnan : A chhutna (arrow cross-mark) chu sana inherdan ni lo zawnga siam (anti-clock wise) a nih chuan ballot paper thleh avanga mark dik lo kai chu sana vir zawng (clock wise) a ni ve thung ang.

5. Vote chhiar chungchanga hriattur pawimawh dangte: i)Candidate pakhat emaw vote thi mahse candidate dangte vote a nun si chuan chu ballot paper chu hnawl (reject) a ni lo ang.

ii) Candidate mal bik tana vote thi tarlan a ni lo ang a, common ballot paper thi zat chauh tarlan a ni ang.

iii) Candidate emaw an Election Agent-te emaw chu vote chhiarna hmunah an thutna tur siam sak an ni ang a, vote chhiar kalpui dan chu an thlir phalsak a ni. A bik takin vote thi chungchanga Returning Officer in thutlukna a siam hmain candidate emaw an agent-te emaw chu an enchian phalsak an ni ang a, ballot paper erawh chu an tawh ve a rem lo ang.