Aizawl Bawrhsap Pu J. Hmingthanmawia hovin vawiin khan District Disaster Management Committee an thukhawm a, Kangmei chhuak tam lutuk ngaimawhin tun tumaa thutkhawmah hian In kang, (Domestic Fire) chungchang an thlur bing a ni. January thla hnua Mizorama kangmei rapthlak tak tak a chhuah thin avangin Special Invitee in mi engemawzat an sawm nghe nghe a ni.
Mizorama in kang tam berah Electric sort puh thin a ni a; tunhnaia Saiha khawpui tumhnih kang kha chu Bati chit tlansan vanga kang a ni a, tikangtu man te pawh zu rui an ni deuh zel nghe nghe. Mizorama Chhiarrupna lo thleng tam ber chu Kangmei, mihringte tihkan a ni deuh zel a ni. Mizote hi in inhnaih te te a sak ching kan nih avangin kangmei a chhuahin thenawmte in a kangkai fo thin; Aizawl-ah pawh kan inte a insi deuh thup mai a, kangmei laka kan fihlim nan mi tin kan fimkhur em em a ngai tak meuh a ni.
Kangmei chhuah hlauhawm zualna hmun: New Market leh Bazar dungtluan te, Mi mal in a sumdawnna in thahnem tak a awm bawk a; Mipui kal khawmna thin Vanapa Hall te, New Secretariat sak tharah ngei pawh Fire Extinguisher tha tawka fit a tlem hle a, chu hmanraw pawimawh tak hmang thiam an awm mumal loh phei chuan a pawi thei hle tih hriat a tha ngawt mai. Fire Extingsuisher hi Fire Department-ah subsidy-a lei tur thahnem tak a awm a; lei duh chuan ngaihven nise, Department te pawhin ngaihven thar nise a duhawm. Fire Extinguisher filling hi Guwahati-ah chauh a awm avangin a rang thei ang berin Sorkarin Filling Station neih dan ngaihtuah se a duhawm.
PHE Department-in kangmei chhuah veleh a awlsam taka tui lak theih turin Aizawl khawpui hmun tam zawkah tui point siam vat se a duhawm hle bawk.
Private Hospitals leh Private Market tam takah a neitute emaw, Dawr neituten emaw Kangthelhna tur ruahman dan ngaihtuah theuh tura ngen tum a ni a; Millennium Centre, Solomon`s Cave, P.L. Market, Lalbuaia Shopping Market etc te pawh theihtawpa fimkhur tura ngenna pek tum a ni. Sorkar Enkawl New Market-a Association hrang hrang hotute chu Trade & Commerce hotute remruatnain a rang thei anga Dawrpui M/S Hall-a kohkhawma Kangmei laka fimkhur tulzia sawipui tum a ni.
Local Council inthlan zawhfel hnuin Local Council Chairman te leh YMA Branch tina President te ko khawma titi pui nise, annin mahni veng theuhvah kangmei laka fimkhur tulzia a zau thei ang bera puang tura ngen tum a ni bawk.
