Nimin (8.11.2019) khan Secretariat Conference Hall, MINECO ah Mizoram Science, Technology & Innovation Council (MISTIC), Directorate of Science and Technology, Mizoram leh Council of Scientific and Industrial Research - Advanced Materials and Processes Research Institute (CSIR-AMPRI), Bhopal tangkawp buatsaih Seminar on 'Bamboo Composite Materials for Structural Applications' neih a ni a, Dr K Pachhunga, MLA, Vice chairman, Mizoram Bamboo Development Board ni bawk chu khuallian a ni a Pu F Lalnunmawia, MLA, Vice Chairman, Horticulture Development Board ni bawk chuan a telpui a ni.

Khuallian Dr K Pachhunga, chuan Mizoram sawrkarin hna thawk turin kawng hrang hrangin hmalak a tum mek thu sawiin chumi atan chuan Socio-Economic Development Programme kalpui nan Board hrang hrang din a nih thu a sawia, chumi hnuaiah chuan Bamboo Development Board hmangin Mizoram a mau te tangkai zawka hman anih theih nan hmalak anih tur thu a sawi bawk. Dr K Pachhunga chuan Mizoram chhungah Mau chu a hranpaa enkawl a ngaih loh avangin Chief Minister pawhin ram hmasawn nan tangkai taka hman atana hmalak anih tur thu a sawi a, mau a kan hausakna hi thiamna hmanga tlo zawk leh hlu zawk a kan sawngbawl thiam a tul thu a sawi bawk. Khuallian chuan Mizoram ram hruaitu zingah Science lama tui mi thahnem tak an awm thu sawiin ram tana thuthlukna pawimawh tak tak siam kawngah hemi hian hmasawnna a thlen ngei a beisei thu a tarlang. Khuallian chuan Mau chu hman ata tawh mizote nitin nunah hmun pawimawh tak a luah thin thu a sawi a, ram hmasawnna atan tunlai thiamna nen tangkawpin kan ram hausakna hi chhawr tangkai a ngaih thu a sawi bawk a ni.

Pu F Lalnunmawia, MLA pawhin thu sawiin hun rei tak chhung Mizorama Mau awmte tangkai taka hman a nih theih nan ngaihtuahna a sen thin thu a sawi a, CSIR-AMPRI leh MISTIC tawngkawpin hma an lakna chuan rah chhuah tha a neih ngei a beisei thu a sawi bawk.

Seminar ah hi Dr Lalnuntluanga Colney, Principal Scientific Officer, DST in hun a kaihruaia Dr SKS Rathore, Senior Principal Scientist leh Dr AK Srivastava, Director, CSIR-AMPRI ten Mau hmanga insakna hmanrua siamchhuah anih dan leh hlawk zawk a tihral anih theih dan te sawifiahna hun an nei a. Dr S Murali, Principal Scientist in ‘Overview and Prospects of Major Bamboo species in India for Multi-purpose Application’ leh Dr SAR Hashmi, Chief Scientist in ‘Bamboo composites: A new material of Construction’ tih hmangin presentation an pe a Pu Davy Lalruatliana, Scientific Officer, MISTIC in ‘Banboo Resources in Mizoram’ hmangin presentation a pe bawk.

Seminar-ah hian traditional piah lama mau hman tangkai dan hrang hrangte ngaihthlak a ni a Bamboo Composite hmanga insakna bungrua siam dan te thlir ho a ni. Seminar a tar lan danin Mizoram ah hian 6760.71 Sq.Km hi mau awmna hmun a ni a, Mizoram zau zawng za zelah 32.07% ang ni a chhut a ni. India ram a Mau chinna hmun za zela 14% hi Mizoram a awm anga chhut niin 24 species indigenous leh 12 species hi introduced anga chhinchhiah a ni a, Mamit leh Lunglei district ah mau hi a tam zual a ni. Mizoram mau species hrang hrang zinga 95% hi  Melocanna Baccifera (Mautak) a ni a CSIR-AMPRI a mithiamte chuan he species hi thil hrang hrang siamchhuah nana hman nasat mau species a nih thu an sawi bawk.

Nimin Seminar hi MIRSAC, BIOCONE, STAM, Mizofed, Zonun Mat Ply, MZU, Directorate of I&PR, Department of Environment, Forests & Climate Change, Horticulture department, Mizo Academy of Sciences leh Local Innovators engemaw zat in an telpui a ni.