Vawiin khan Mizoram Journalist Association member 9 leh  I&PR Official 3, Chennai & Puducherry a Press Study Tour nei turte chu I&PR Minister Pu Lalruatkima'n I&PR Directorate kawt atangin a vailiam.

An chhuah hma hun tawite Pi Lallianpuii, Director, I&PR kaihhruaina a hmanah Pu Lalruatkima chuan Press mite hnenah I&PR buatsaih Press Study Tour chu tangkai taka hmang turin duhsakna a hlan a, tunlai khawvelah hmasawnna kawng engkimin a zuang a, technology a sang tawh a ni a ti a, India ram khawpui upa leh changtlung hmasa zawk Chennai leh Puducherry ah te pawh thil pawimawh tam tak an zir chhuah a beisei thu sawiin nuam tawl a kal tur an ni lova, thil thar leh pawimawh  Mizoram-in a tihve theih thil chi hrang hrang te rawn zir a, mipui leh sorkar-in a tangkaipui theih tur rawn paw haw turin a chah a ni.

Press Study Tour hi November ni 9, 2019 atanga November ni 15, 2019 thleng neih tur a ni a. Mizoram district hrang hrang atanga MJA member thlanchhuahte an tel a, Pi K. Vanlalsangi, MIS leh Pu Andrew H.Lalremruata, MIS ten an hruai a ni.