No.429/2020-2021

East Tuipui bialtu MLA leh Vice Chairman Bamboo Link Road Board ni bawk Pu Ramthanmawia chuan  zanhnih riakin a bial chhung  Myanmar ramri Tiau kaia Village Level Task Force, Police leh Assam Rifle duty na hmun a tlawh. Ramria duty na hmun a tlawh pah hian a bial chhung khaw hrang hrang a fang nghal a, tanpuina cheng nuai hnih leh singnga hu zet a sem bawk a ni.

A Bial chhung hmun hrang hranga Duty Police Force te hnenah COVID-19 lak invenna hmanrua, mask, hand sanitizer te bak ah buhfai, alu , dal, chini, tel, sangha tin, silpaulin leh thingpui lumna hmarua  te a  pe. A bial chhung khaw hrang hrang Village Level Task Force te hnenah pawh pawisa fai bakah hand sanitizer , mask leh thingpui lumna hmanruate a pe bawk. Sesih, Farkawn, Khawbung, Bungzung PHC ah glove, hand sanitizer leh mask te a pe bawk a ni.

Pu Ramthanmawia chuan East Tuipui bial chu  Myanmar ramri ral hmatawnga awm  kan nih avangin Police Force leh Village Task Force te mawhphurhna a sang hle a, Mizoram mipui himna hi an kutah a awm a ni, a ti a. Chhun leh zan pawh sawi thei lo leh  mahni in lum pawh luahlum hman lovin rampalailengah  Mizoram a  him nana duty tlaivar thin te zawng zawng chungah lawm thu a sawi a. COVID-19 hripui leng atanga Mizoram  a him nan a an thawhrim  ziate, an hmalak dante a hmun  ngei ah a  hmuhpui in an harsatnaah leh manganna apiangah puih reng a inpeih thu a sawi bawk a ni.

Bamboo Link Road Board Vice-Chairman Pu Ramthanmawia hi Champhai BDO Pi R.Lalnunkimi'n a tawiawm a, Village Level  Task Force te hnenah CM Relief Fund a sem pah zel bawk a ni.