N0.428/2020-2021

Hnahthial District Bawrhsap leh District Level Task Force on Covid 19 Chairman ni bawk Pu Vanlalmawia hovin Superintendent of Police (SP) Pu Lalbiakkila leh Hnahthial District Hospital a Medical Officer Dr.R.Lalsanglura te chuan vawiin khan Hnahthial District chhunga khaw panga (5) - Chhipphir, Bualpui V, Lungmawi, Pangzawl leh Rawpui khua te tlawhin Covid 19 dona kawnga an hmalakna hrang hrangte an enfiah a, Kohhran leh khawtlang hruaitute chu hmalakna kalpui chhunzawm zel tur atana hriattur tul pawimawh hrang hrangte an sawipui bawk. 

Chhipphir VCP Pu Israel Lalramsanga kaihhruaiin an YMA Zawlbukah  khawtlang hruaitute nen inkawmhona neiin Hnahthial District Bawrhsap Pu Vanlalmawia chuan VLTF - te inpekna leh thawhrimna avangin an chungah lawmthu a sawi a. Covid 19 damdawi hi hmuh chhuah tak tak la nilo mahse mitinin kan tih theih taksa vawn fai a, Kut sil fai taimak, mask vuah leh social distancing-te a pawimawh a , tawngpawng hlauh lutuk tur a ni lova fimkhur erawh a ngai a ni, a ti. Hnathawk thei lova insiam ngawt te, buhfai leh kan nitin mamawh lo dan char ringawt te hi a tuartu tur tho kan ni a, he hri hian eng chen nge min chiah dawn kan hriat loh avangin kan fimkhur reng a pawimawh a, sorkar ruahmanna te zawm chungin theihtawp kan chhuah tlan a pawimawh a ni, a ti. Chutih rualin thenawm khawvengah harsa zualte a awm em tih ngaichang ru rengin theihtawpin hma ila tlang ang u tiin Zonun zemawi lan chhuah tirin a nei zawk ten neilo te kep nachang i hre zel ang u" a ti bawk. 

Hnahthial SP Pu Lalbiakkila pawhin thu sawiin Covid 19 hi thil thar a ni a, khawvel hian ala hre chiang tak tak thei lova kan himna atana pawimawh ber chu fimkhur niin he hrileng laka kan himna tura pawimawhte chu midangte nena inhhnaih lutuk lova awm te, kut silfai ngun leh Mask vuah te a ni a ti a. Lockdown kalpui mekah hian sorkarin dan leh thupek mumal tak a siam a, hei hi mipuite te leh VLTF tin ten kan zawm tlat a pawimawh a ni, a ti bawk. 

District Hospital Hnahthial a Medical Officer, Dr.Sanglura chuan kalkhawmte chu Covid 19 dona kawnga hriattur tul pawimawh hrang hrang te a zirtir a ni.

He hunah hian Khaw hrang hrang khawtlang hruaitute hian an khawtlang mamawh leh harsatna hrang hrangte an thlen a, Village Level Task Force hnenah Hnahthial District Bawrhsap chuan Chief Minister's  Relief Fund  leh District Level Task Force atangin an mamawh zualpui phuhrukna tur sum bakah DLTF in Mask an thui chhuah 50 theuh leh a tula an hman atan Silpouline a hlan a ni

Hnahthial District Bawrhsap, SP leh Medical Officer-te Khawtlang hruaitute chuan meeting an neih pui hnuah Damdawi In leh Sorkar hmunhma hrang hrangte te tlawhin an enfiah a ni.