1160/2026-2027

Aizawl, dated 24th June, 2026: Vawiin khan Planning & Programme Implementation Department Committee Room-ah Bana Kaih Scheme hnuaia Chief Minister Special Package leh Loan Component dilna lut tharte en hona hun hman niin, MSPCC Vice Chairman Dr. KC Lalmalsawmzauva chuan thutkhawm hi a kaihruai a ni.

Hun kaihruaitu Dr. KC Lalmalsawmzauva chuan Bana Kaih Scheme chu mi taima leh tumruh, hlawhtling tura theihna leh thiamna neite khai chhuahna tura ruahman a nih angin, Implementing Department tin a Nodal leh Assistant Nodal Officer-te chuan dilna lutte chu uluk taka zirchiang zel turin a chah a. Thiamna leh theihna nei, mi taimate khai chhuahna chuan an mahni eizawnna kawngah hlawhtlinna a thlen dawn bakah ram tih hmasawnna kawnga hmanraw tangkai an nih theih thu a sawi bawk a ni.

Thutkhawmah hian Bana Kaih Scheme hnuaia Chief Minister Special Package leh Loan assistance dilna lutte chu uluk taka thlîr ho niin, Implementing Department pasarih (7) hnuaia dilna lut tharte vawiin hian en ho a ni a. Cooperation Department hnuaiah dilna 8, Horticulture Department - 1, UD&PA department hnuaiah dilna 7, LESDE hnuaiah dilna 10, Tourism department hnuaiah dilna 10, Land Resource, Soil & Water Conservation - 11 leh Commerce & Industries Department hnuaia dilna lut 378-te en ho a ni. Loan assistance dilna lutte en dik a ni bawk.

Serchhip district-a NABARD hnuaia tribal chhungkaw dinhmun chawisanna tur, TRIBES leh ATMA Serchhip district kaltlanga Bana Kaih scheme tangkawpa hmalakna thilr ho a ni a. Hei hian kuthnathawka eizawng chhungkaw 400 bakah puan tah leh puanthuia eizawng chhungkaw 100 a tuam a. Hualtu, Hmuntha, Khawbel, Sialsir, Serchhip, Chhiahtlang leh Thenzawlah Tung, Chhawchhi, Litchi, Lakhuihthei leh Sawhthing hmun siam turin ruahmanna kalpui mek a nih thu tarlan a ni a. He program kalpui nan hian chhungkaw pakhat tan TRIBES atangin Rs. 80,000 bawr vel NABARD-in a tum sak anga, Bana Kaih Scheme atangin Sawrkarin Rs. 19,000 bawr vel a tum bawk dawn a ni.

Thutkhawmah hian Biofertilizer uar zawka hman pawimawhzia sawi ho niin, Agriculture, Horticulture leh Veterinary & Animal Husbandry thawhhona a tul zia sawi lan niin, Mizoram chu Organic State ni turin ‘Biofertilizers’ siam chhuah leh nasa zawk a hman a pawimawhzia zirtirna kalpui a nih theih nan Bana Kaih Scheme chu tangkai taka hman a nih tur thu sawi a ni a. Tun dinhmuna Biofertilizer kan hman dan leh kan mamawh dan zirchiang turin Task Force din a tul thu rel a ni. Sawhthing thar chhuahte vawn ṭhat reng an nih theih nan leh kut hna thawkten an thar chhuahte rualkhai zawk leh man tha zawka an hralh theih nan, Bana Kaih Scheme hnuaiah hian Root Cellar siam hna chu kalpui ngei ni se tiin an rel bawk.

Thutkhawmah hian Bana Kaih Scheme hnuaia CM Special Package leh Loan Assistance dawngtute hmasawnna tehfung chhinchhiahna tur duan chhin, Achievement Report Format en hona neih a ni a. Foreign placement loan leh Education Loan chungchângte thlir ho niin, Industrial & Processing unit-te tana last mile connectivity support pek dan tur inkaihhruaina siamte thlir ho a ni bawk.

He thutkhawmah hian P&PI Department Secretary Pu David Lalthantluanga leh Mizoram State Policy Coordination Committee Member-te leh Bana Kaih Scheme Implementing Department atangin Nodal Officer leh Assistant Nodal Officer-te an tel a. NABARD Assistant General Manager leh Serchhip District ATMA Project Director chuan Serchhip District-a TRIBE leh Bana Kaih Scheme hmanga kuthnathawktute tihhmasawn hna an kalpui dan report an pe bawk a ni.