1161/2026-2027

Lunglei, 2026 Nikir thla ni 24: Vawiin khan Lunglei District Sports Committee (LDSC) chu Lunglei District Additional Deputy Commissioner Pi Zoramdini kaihhruaiin Lunglei DC Conference Hall-ah an ṭhu khawm.

LDSC Secretary, District Sports & Youth Officer Pu Rozamliana'n report pein, thu ngaihtuah tur a sawi zau va. Financial Secretary Pu K. Lawmchhunga hnen aṭangin sum dinhmun ngaihthlak a ni bawk.

Vawiin ṭhut khawmah hian Lunglei District chhunga sports association hrang hrangte'n District ai awha an feh chhuahnaa an sensote phuhrukna tura sum (promotional fund) an dilnate thlir ho niin, LDSC inkaihhruaina anga Inter-District inelnaa District ai awha feh chhuakte kal lam emaw, haw lam emaw lirthei chuan man (sumo fare) rulh letna tur pek theih chin chu pawmsak an ni a. Felfai zawka thil kalpui a nih theih nan inelnaa kal man senso phuhrukna tur dilna hi sports association-te'n inelna zawh hnu thla hnih chhungin LDSC-ah lehkha pawimawh hrang hrang thil telin theh luh hman tum ni se, hun tiam chhunga theh lut hman lote dilna chu ngaihtuah zui loh ni se, tih a ni.

LDSC hnuaia sports association-te hlawhtlinna leh chet velna hrang hrangte felfai zawka chhinchhiah a nih theih nan DSYO lamin report theh luhna tur inang tlang lo ruahman se, chumi hmang chuan sports association-te'n kum 2025–2026 chhunga an chet velna leh hlawhtlinna chanchinte LDSC-ah lo theh lut se, tih a ni a. Sports association hrang hrangte intuamhlawmna tur sum mamawh hmuh belh a nih theih nana hma lak dan tur te sawi ho a ni bawk.