2782/2024-2025

Aizawl, 30.10.2024: Vawiin chawhnu khan Mizoram State Policy Coordination Committee (MSPCC) chu Bana Kaih Scheme kel mekah department thenkhat hnuaia dilna lutte ngaihtuahin an thukhawm. Meeting hi Adviser to Chief Minister for Implementation of Handholding Scheme Dr. KC Lalmalsawmzauva kaihhruaiin Planning & Programme Implementation Department Meeting Room-ah an thukhawm a ni.

Meeting ah hian lirthei lei chungchanga dilna lut chungchang sawiho in, Taxi (2-wheeler, 4-wheeler leh autorickshaw) atana dilna chu Handholding Scheme hian a huam telloh thu sawi a ni a. Commercial Passenger Vehicle dangah chuan a diltu ngei hminga State Transport Authority (STA) permit / licence nei tawh tan scheme hian a huam thei dawn a ni.

CM Special Package dilna chu Chief Minister's Office ah dilna thehluh tura ruahman chu mipui remchan zawkna atan mahni district Deputy Commissioner-tw hnenah pawh dilna thehluh thei tawh tura rel a ni.

Banakaih (Handholding) Scheme inkaihhruaina bu Mizo tawng a lehlin chu thlirho niin meeting-ah hian pawm a ni a. Scheme publicity chungchang sawiho ni bawkin ruahmanna chhawpchhuah te sawiho a pawm a ni bawk.

Vawiin meeting-ah hian MSPCC member te leh Planning & Programme Implementation, Commerce & Industries, Transport, Tourism, Information & Public Relations leh Information & Communication Technology Department atangin leh SBI, Apex Bank leh MCAB atang te in an tel a ni.