2781/2024-2025
Aizawl dated 30th October 2024: Vawiin khan College of Veterinary Sciences & Animal Husbandry, Selesih chuan '26th Foundation Day' lawmna hun an hmang a. Prof. Lalnilawma, Minister, Rural Development department chu khuallian niin Rural Development Department, Department of Veterinary & Animal Husbandry leh ICAR, Kolasib a thawktute he hun ah hian an tel a. Dr. Lalnuntluangi Hmar, Dean, CVSc & AH, Selesih chuan kalkhawmte lawmna thu a sawi a ni.

Rural Development Department Minister Prof. Lalnilawma chuan Foundation Day vawi 26-na hmang thei a College of Veterinary Sciences & Animal Husbandry, Selesih a thawktute thawhrimna fakawm a tih thu leh a lawmpui thu a sawi a. Mizoram leh hmarchhak state a thalai ten thiamna tluantling, eizawnnatlak leh intodelhna kawng a thiamna chherchhuahna hmun kan nei chu tangkai tak a hman a pawimawh thu a sawi. Prof. Lalnilawma chuan CVSc & AH, Selesih atanga zirlai hlawtling thahnem tak an awm chho zel chu lawmawm a tih thu leh Sawrkar hnuai ah hna tha tak tak an zawk chu fakawm a tih thu a sawi a. Hetih rual hian mahni thiamna rinchhan a eizawnna bultan mi thahnem tak an awm chu entawntlak a tih thu a sawi bawk a ni.

Khuallian chuan College tichangtlung leh tihmasawnna tur a thawktuten Research Project engemaw zat an kalpui chu lawmawm a tih rualin heng Research Project kaltlang a thiamna thar hmuhchhuahte hian ran vulhtute leh kut hnathawktute thleng pha ngei tur a tan la turin thawktute a fuih a. Zirna kawng a hlawtlin bak ah harsatna hrang hrang hmachhawn thiam zir tel turin zirlai kalkhawmte a chah bawk a ni. Rural Development Minister chuan midang tan a kan thiamna leh theihna hman chhuah te, khawtlang leh ram tan a mi tangkai nih tum turin zirlaite a fuih bawk a ni.

Dr. Lalnuntluangi Hmar, Dean, CVSc & AH tarlan danin College of Veterinary Sciences and Animal Husbandry, Selesih hi India hmarchhak state hrang hrang a Central Agriculture University 13 zing a mi a ni a. October ni 30, 1995 khan, khatih hun lai a Chief Minister, Pu Lal Thanhawla chuan college lungphum hi a phum a ni. CVSc & AH, Selesih ah hian Bachelor of Veterinary Sciences & Animal Husbandry degree zirna bak ah kum 2006 - 07 atang khan Master of Veterinary Sciences degree zirna hawn belh a ni a. Department 16 ah MVSc degree zirna hi awm mekin kumin thleng khan zirlai 1163 an zirchhuak tawh a ni. Tun ah hian zirlai 568 awm mekin heng zing a zirlai 460 te chu BVSc zirlai an ni a, MVSc zirlai 105 leh PhD zirlai 3 an awm bawk a ni. 26th College Foundation Day lawmna hun ah hian Silver Jubilee Souvenir tlangzarh niin College tihchangtlunna leh tih hmasawnna tur a thawktute chawimawina hun hman a ni a, 'AICRP on Pig' leh NEH Project hnuai a hamthatna awmte semna hun hman niin hnam thuam leh lam te entir a ni bawk.