2236/2026-2027

Aizawl dated 16th September 2026: Planning & Programme Implementation Committee Room-ah vawiin chawhma khan Mizoram State Policy Coordination Committee (MSPCC) chuan Bana Kaih Scheme Phase ii kalpui mek hnuaia Chief Minister Special Package dilna 910 leh Bana Kaih Scheme Loan Component dilna 106 endikin thutkhawmna an nei a. He hunah hian dilna lutte hi a changtu Implementing Department-a Nodal Officer-ten endikna an lo kalpui tawhna atangin report an pe a. Dr. KC Lalmalsawmzauva, Adviser to Chief Minister leh Vice Chairman, MSPCC chuan he thutkhawm hi a kaihruai a ni.

Adviser to Chief Minister Dr. KC Lalmalsawmzauva chuan Bana Kaih Scheme hnuaia tanpuina chu a thlawn a sem a ni lo, tih a sawi a. Hemi avang hian a dawngtu tur thlan chhuahna kawngah pawh Implementing Department-a Nodal Officer-ten mi rintlak, hmasawn tum tlat, taima leh thiamna hmantlak neite thlan chhuah an nih ngei theih nan, dilna lutte thlitfim kawngah uluk leh fimkhur taka kalpui a pawimawh thu a sawi. Bana Kaih Scheme Phase I leh II kalpui chhung hian Sawrkar hnuaia Implementing Department leh Partner Bank hrang hrangte thahnemngaihna leh inpekna avangin Mizoram khaw hrang hrangah chhungkaw thahnem takin eizawnna ngelnghet an neih phah mek thu a sawi a. Mipui rawngbawl tura Bana Kaih Scheme tih hlawhtlin nana thawktu pawimawh tak an ni tih hre reng turin Implementing Department atanga Nodal Officer leh Bank hotu kalkhawmte chu a chah a ni.

Vawiin thutkhawm ah hian CMSP dilna 910 lut zingah hian AH & Vety Department atangin dilna 496, Horticulture Department atangin 185, Commerce & Industries Department atangin dilna 119, Land Resources, Soil & Water Conservation Department atangin dilna 69, Fisheries atangin dilna 19, ICT atangin dilna 6, Agriculture & Farmer's Welfare Department atangin 5, I&PR Department atangin dilna 2 leh Tourism Department atangin dilna 1 a awm a ni. Loan Component dilna 106 lutte hi Implementing Department-a Nodal Officer-ten a mal te tein sawi fiahna an nei a. MSPCC member-te nen uluk takin zirchian niin, siam that ngai, thlak danglam ngai leh paih ngaite endik a ni.

September ni 18 atang hian Bana Kaih Scheme Phase III kalpui tan leh turin inbuatsaihna a kal mek a ni.