2237/2026-2027

Lunglei, 2026 Mimkut thla ni 16: Vawiin khan Lunglei District Deputy Commissioner Office huaihawtin BCM Hall, Serkawn, Lungleiah Mizoram Bana Kaih (Handholding) Scheme Phase-II hnuaia Chief Minister's Special Package kal tlanga Lunglei District-a bana kaih tur (progress partner) thlan chhuah mi 509 te tana an hma lak dan tur inhrilhfiahna leh ṭanpuina sum semna, “Orientation Training-cum-Distribution of Assistance” buatsaih a ni a. Lunglei High Powered Committee (HPC) Vice Chairman, Lunglei North bialtu MLA Pu V. Malsawmtluanga'n Khuallian niin a hmanpui.

Khuallian Pu V. Malsawmtluanga chuan Bana Kaih chu Mizoram sawrkar flagship scheme a nih angin a hlawhtlin nan sawrkarin theih tawp a chhuah thu leh mipuite an bana kaih chu sawrkarin a ngaih pawimawh lai tak a nih thu sawiin, a hlawhtlinna a taka hmuh tur a awm chho zel chu lawmawm a tih thu a sawi a. Sawrkar hma lakna hlawhtlin nan sawrkar hna thawkte chu a pawimawh hmasa an nih angin Bana Kaih hlawhtlin nan pawh sawrkar hna thawkte’n theih tawp an chhuah tih sawiin, an thawh rimnaah lawm thu a sawi a. Bana Kaih hlawhtlinna atana sawrkar leh sawrkar hna thawkte ṭhahnem ngaihna leh thawh rimna chu a thlawna a luan ral mai loh nan progress partner-te’n theih tawp chhuaha hma an lak a ṭul thu sawiin, a bik takin CM Special Package ṭanpuina dawngtute chu a vannei hmasa an nih hria a, an ṭanpuina dawnte a nih dan tur taka hmang tur leh hmasawnpui ngei tum turin a chah a. Progress partner-te’n ṭanpuina an dawn chu an hma lakna tichaktu leh tiphurtu tur, a bul tanna chauh a nih thu sawiin, Bana Kaih hnuaia loan lian tham zawk la thei turin ṭha taka hma la a, hmasawn zel tum turin a chah a. Sawrkarin kut hna thawktute a ngaih pawimawh thu leh kut hna thawktute hmasawnna leh chawi kanna tur te, awlsam leh hlawk zawka an thar chhuah deh ralna tur te’n kawng hrang hrangin hma a la tih sawiin, Bana Kaih leh hma lakna hrang hrang kal tlangin Mizoramah hmasawnna a thlen chhoh zel a beisei thu a sawi.

He hun hi Lunglei District Fisheries Development Officer Pi Christina Lalramchhani’n a kaihruai a. Additional Deputy Commissioner Pi Rochuangkimi Khenglawt chuan inlawmna thu sawiin, Bana Kaih hnuaia CM Special Package dawngtute chu training chu hlawk taka hmang a, an hma laknaah District tihming ṭhatu ni tura theih tawp chhuah turin a chah a. Progress partner-te chu suma ṭanpui an nih bakah, sawrkar chuan department kal tlangin an hma lakna turah kaihruaiin, a ṭul angin a vil zui zel dawn tih a sawi.

Orientation training hi hun hniha buatsaih a ni a. Chawhmaah Animal Husbandry & Veterinary, Fisheries leh Agriculture & Farmers Welfare Department hnuaia progress partner-te tan training buatsaih niin, District Agriculture Officer Dr Samuel Lalliansanga, Fisheries Extension Officer Pu Lalruatfela Chhangte leh District AH&Vety Officer Dr Lalmuanpuia Samte te’n progress partner-te tana hriat tur pawimawh hrang hrang an zirtir a. Chawhnu lamah Commerce & Industries, Urban Development & Poverty Alleviation, Tourism, Cooperation, Sericulture leh Horticulture Department hnuaia progress partner-te tan training buatsaih chhunzawm niin, District Sericulture Officer Pu ZD Zoramthanga, District Horticulture Officer Pu Lalṭhakima leh District Commerce & Industries Officer Pu F. Lalsawmliana te’n thil pawimawh hrang hrang an zirtir a. Zawhna leh chhanna leh sawi hona hun hman a ni bawk.

Mizoram Bana Kaih Scheme Phase-II hnuaiah hian Lunglei District chhungah CM's Special Package kal tlanga bana kaih tur (progress partner) thlan chhuah thar 509 awmin, hemi atan hian a zavaiin Rs 2,54,23,000/- (cheng vaibelchhe hnih, nuai sawmnga pali, sing hnih leh sang thum) sem chhuah a ni a.  Progress partner-te hi Animal Husbandry & Veterinary hnuaiah 287, Commerce & Industries hnuaiah 145, Horticulture hnuaiah 47, Fisheries hnuaiah 15, Agriculture & Farmers Welfare hnuaiah 7, Tourism hnuaiah 3, UD&PA hnuaiah 2, Sericulture hnuaiah 2 leh Cooperation hnuaiah 1 an ni.

Orientation training buatsaih rual hian progress partner-te hi certificate leh an huan/dawr-a tar tur thuziak pek nghal an ni a. Ṭanpuina sum hi a dawngtu turte bank account-ah direct benefit transfer hmangin thun nghal a ni ang.