3187/2022-2023
Aizawl 6th January 2023: Bangladesh atanga Mizoram chhimtawp lama Zo hnahthlak rawn tlanlut te chungchangah Lok Sabha member Pu C.Lalrosanga chuan Union Home Secretary Pu Ajay Kumar Bhalla leh BSF Director General Pu SL Thousen-ate vawiin khan phone in a bia.

Bangladesh a buaina avanga tunhnaia Mizoram chhimtawp lama rawn tlanlutte lakah zaidawh a, dimdawi taka an laka che tura BSF sipaite hriattir chiang turin a ngen a. Harsatna tam tak kara ei in leh silh leh fen pawh nei mumal lova India ramchhunga lo luta Mizorama himna rawn zawngtute hi mihring dan pangngai anga enkawl an ngai a ni a ti. Home Secretary chuan Bangladesh nena inrina hrula thilthlengte chu a hriat thusawiin a tul dan anga hmalak zel a nih tur thu a sawi a. Thil awmdan an thlithlai zel a ni tih a sawi. 

BSF DG chuan an mawhphurhna an hlenchhuahna kawngah mihring dikna leh chanvo humhalh chunga dimdawi taka che tura an mi leh sate an chah thu a sawi a. A theih chin chinah ei in leh damdawi lama tanpuina kawngah pawh an theih ang ang BSF mite chuan an ti a ni a ti. Lok Sabha MP hian nimina BSF Inspector General a biak bakah vawiin vek khan Lawngtlai DC leh  MDC thenkhatte leh  Parva a khawtlang hruaitute biain thil awmdante a zawtfiah a. Ramri hrul hmuna thilawmdante enfiah leh vawngfel tura hma la zel turin a chah a ni.