Nimin ni 19.4.2010 khan Bangladesh sorkar officials pawimawh tak tak ten Bangladesh High Commissioner to India Pu Tariq A.Karim hovin India-Bangladesh Border Trade point an tlawh a, hei hi Bangladesh officials ten insumdawn tawnna chungchanga Mizoram ramri a hmun ngeia an rawn tlawh hmasak ber a ni.
High Commissioner Pu Tariq A. Karim hi Bangladesh Commercial Counsellor bakah Residential Commissioner ten an tawiawm bawk a. Trade Point-a an thil hmuhte chu Bangladesh sorkarah chipchiar takin an thlen tur thu an sawi a ni. India leh Bangladesh insumdawn tawnna atana hmalak theih awm ang ang chu a rang thei ang bera inbuatsaih turin hmalak an tum thu an sawi bawk.

Ram pahnih officials ten border an tlawh denchhenin Health & Family Welfare Department chuan Free Clinic an buatsaih a, Bangladesh leh a chhehvel khua atangin mipui tam takin he Free Clinic hi an rawn chhim a ni.