Bangladesh-North East India Trade & Investment Conclave leh Joint India-Bangladesh Trade Show February ni 25, 2010 Dhaka khawpuia Mizoram aiawha zuk kal te chu tluang takin March ni 2 khan Aizawl an lo thleng leh tawh a. Hemi tuma sawm an nih anga zuk kal te hi Trade & Commerce Minister Pu Lalrinliana Sailo, Parliamentary Secretary Pu S.Laldingliana, Trade & Commerce Secretary Pi Esther Lalruatkimi leh Trade & Commerce Director Dr.C.Lalzirliana te an ni.

 

 

Conclave hi Bangladesh sorkar Foreign Affairs Minister Dr. Dipu Moni in a hawng a. Trade & Investment Opportunities Session-ah Mizoram Trade & Commerce Minister Pu Lalrinliana Sailo chuan thuhma sawina hun changin tunah chuan Banladesh sorkar leh Mizoram ten inpawh tawn takin hma an la ho thei tawh dawn a ni a ti a, Conclave chungah lawmthu a sawi. Pi Esther Lal Ruatkimi pawhin Mizorama sumdawnna bultan turte tana thil hriat tur leh kawng inhawn zau that dan te a sawi zui bawk. Hemi zan hian Bangladesh Prime Minister Sheikh Hasina kawmna hun tha tak a nei nghal a, Bangladesh PM hnena thil pawimawh chi hrang hrang te chu - Ram pahnih Foreign Minister ten 24 September, 2009-a Thegamukh-Demagiri inkara Trade Route hawn rem tih thu Joint Statement an siam chungchang te; Mizoram thlai, mau leh thildang tharchhuah Bangladesh-a hralhchhuah tur a neih te; Tlabung Kawrpuichhuah hmuna insumdawn tawnna hmun tur ram hectare 9 laia zau pek fel a nih tawh dan te leh Thegamukh, Bangladesh lama Land Customs Station emaw Integrated Check Post din thuai a tul dan te bakah Mizoram chu lehkhathiam tamna state leh state ralmuang a nih avanga sumdawngtute tan remchanna thu tak a inhawn chungchangte an ni.

Mizoram zuk kal te hian February ni 27, 2010 khan Chittagong an tlawh bawk a. Hetah hian Bawm zirlaite nen inkawmna hun tha tak hmangin Mizoram Chief Minister Pu Lal Thanhawla’n Zoram pawna Zohnahthlak te thlavang a hauhzia an sawiho a ni.

February ni 28-ah Cox Bazar tlawh lehin hetah hian Mayor, Chittagaong City Corporation Pu A.B.M. Mohiuddin Chowdhury-in zanriah a buatsaih sak a ni.

Bangladesh an cham chhung hian Pu Dipankar Talukdar, M.P., State Minister, Ministry of Chittagong Hill Tract Affairs leh Pu Shiv Goyal Shankar, Chairman, Gmbt. (Garment Exporter) te hmuin Mizoram tana tangkai thei thil chi hrang hrang huam zau takin an sawipui a ni.

Mizoram atana zuk fehchhuakte hi Pu Ashok Yadav, First Secretary, Dy. Indian High Commission-Chittagong chuan a tul anaga lo buaipuiin March ni 1 khan Chittagong International Airport atangin a rawn thlah liam a. March ni 2, 2010 khan dam takin Aizawl an lo thleng a ni.