3736/2022-2023

Pu Albert Lalnunpuia, MPS,SDPO/PRO Mizoram Police, Lunglei chuan Bank Account detail share chungchangah 1st March, 2023 khan ahnuai a mi ang hian mipuite hriattur thu a chhuah.

Ni 18/2/2023 khan mi pakhat chuan Bazar Veng, Lunglei a SBI ATM Booth-ah ATM a khawih thiam meuh loh avangin a bula lo awm a hmelhriatloh pakhat chu a ATM Card PIN hrilhin pawisa a lakchhuah tir a. A lakchhuahsak tu pa hian pawisa leh ATM Card a pek let hnuah an khaw lamah a haw ta a. Amaherawhchu, chumi ni tlai atang chuan a account atanga pawisa draw a nih thu SMS a dawng ta fo mai a. A ATM card an endik chuan ama ta ni lo in midang ATM card daih mai a lo ni a, pawisa lakchhuah pui tu khan ATM card dang daih a lo pe a ni. A ATM card chu block tir nghal mahse misual chuan Rs. 65,000/- lai a lo lakchhuahsak hman a ni.

Account neitupa hian ni 25/2/2023 khan Lunglei PS ah FIR a thehlut a, Lunglei Police te'n rang taka hma la nghalin, SBI Bazar Veng Branch a thawktute puihna nen mi bumtu hi T. Lalremruata (33) s/o T. Lalhlira, Bazar Veng, Lunglei a ni tih hriatchhuah a ni. Amah hi 27/2/2023 khan man a niin a kut atangin hian ATM Card leh Rs.5000/- hmuhlet a ni.

Hetianga misual bum kan tawh loh nan hian kan bank account details, ATM Card leh PIN te hmelhriatloh hrilh mai mai lo in, tha taka vawnghim theuh turin mitin te kan inchah tak meuh meuh a ni.