3735/2022-2023

Kolasib dated 2nd March 2022: Vawiin khan Thingdawl Community Hall-ah sumfai tel lo a indawrtawnna uar lehzual a kalpui a nih theih nana Self Help Group member-te tan ' National Campaign on Promoting Digital Transaction' khuh hawnna hun hman a ni a. Pu John LT Sanga, Deputy Commissioner chuan khuallian niin a hmanpui a, Pi Diana K.Hmingthanpari, District Functional Specialist, MzSRLM chuan hun kaihruaiin Pu Gaston Vanlalhriatpuia, BDO, Thingdawl, Pu Hmingthanzuala, DIPRO leh Thingdawl RD Block chhung a Bank hrang hrang hotute an tel a. Thingdawl leh Bilkhawthlir RD block hnuai a Self Help Group atanga Business Correspondence Sakhi Yojna-te hnen ah Digital Transaction chak zawk a kalpui a nih theih nan hmanrua hlanna hun hman a ni bawk.

Khuallian Pu John LT Sanga, Deputy Commissioner chuan thingtlang lam kuthnathawktute chu ram hmasawnna kawng a thawktu pawimawh tak an nih avangin Sawrkar laipui pawhin ruahmanna a siam hian a dah pawimawh hle thin thu a sawi a. Mumal zawk leh sawt zawk a hmalak a nih theih nan hmeichhiate kaltlanga eizawnna tlak thiamthil tihpun hi Self Help Group dinchhan pawimawh tak a nih thu a sawi. SHG chu a huho a hnathawn zirna leh inpuihtawnna hmun tangkai tak a hmang zel turin Deputy Commissioner chuan kalkhawmte a fuih a, eizawnna an dap kawngah khawvel changkangna in a ken tel Digital Platform hmang hmanruate chu hmang thiam zel turin a chah bawk a ni. Digital Transaction hmang a indawrtawnna chu a rangin hun a heh lo a, pawisa lut leh chhuak chhinchhiah a awlsamin pawisa hman dan inenlet kawngahte thil tangkai tak a nih thu Pu John LT sanga chuan sawiin SHG member-te chuan uar lehzual a hmang thin turin a chah bawk a ni.

Kolasib district-a ‘National Campaign on Promoting Digital Transaction’ hawnna hun ah hian Pu David Lalhmingthanga, Manager, SBI, Kawnpui Branch chuan Digital Transaction hman tangkaina leh fimkhur ngaihna hrang hrang tarlanna hun a hmang a. Pu Laldawngliana Sailung, Financial Inclusion Coordinator chuan SHG kaltlanga sumdawnna kalpuina a sum enkawl dan te, Bank nen a inthlunzawm pawimawh zia te a sawi bawk a ni. Campaign hi Thingdawl leh Bilkhawthlir RD Block-ah tum 9 ve ve neih tur a ruahman a ni.

Attachment

  • Loading attachment...