1738/2022-2023
Champhai, the 29th August, 2022: Champhai District chhunga Bank hrang hrang kaltlanga hmalaknate thlirletin District Consultative Committee (DCC) chu vawiin chawhma dar 11:00 khan an Chairman, District Bawrhsap Pu James Lalrinchhana hovin DC Conference Hall-ah an thukhawm. He hunah hian June 2022 quarter tawp thlenga Champhai District RD Block 2 huamchhunga Bank leh Stakeholder hrang hrangte hmalakna thlirho a ni. He hun hi Lead District Officer Pu Siddharaj, Manager, RBI Aizawl chuan a telpui bawk.

District Bawrhsap Pu James Lalrinchhana chuan district thang turin banking-a than a ngaih thu leh bank-a thawktute chu district hmasawnna tura mi pawimawh tak takte an nih thu sawiin, anmahni mamawha dawr thintute chu tumah thliar bik nei lova lo dawngsawng thin turin a fuih a. Tlangnel leh ngaihngam taka bank an dawr theih nana inhawng tur leh mamawh an neihte hrilhhre zung zung thin turin a chah a. Awlsam taka hriat leh tihfel mai theih turin bank dawrtute mamawh leh tul angte hrilhhriat kawngah tanlak a ngai a, sawrkar scheme pawimawh leh bank kaltlanga hamthatna awmte tun aia nasa lehzuala inzirtir a tul hle a ni, a ti a. Kumin chhung ngeiin bank account la hawng lo ten an hawn fel vek theih nana hmalak a tul thu sawiin, sawrkar department sum chevel pawh cheque hmang lova online chequeless transaction hmang veka tih a nih theih nana hmalak tum a nih thu a sawi a. DCC Chairman chuan bank-te chu pawisa dahluh dawn mai bakah loan pekchhuah kawnga tan la zual sauh sauh turin a chah a. Bank-a sum dahluh leh mipui tana loan pekchhuah inthlauhna Credit Deposit (CD) ratio-in hma a sawn hret hret zel chu lawmawm tiin, inthlahdah mai lova hmasawn tura tang zel turin a chah a ni.

LDO Pu Siddharaj, Manager, RBI Aizawl chuan Champhai District chu bank-a sum dahluh leh mipui tana loan pekchhuah inthlauhna Credit Deposit Ratio nei tha ber district a nih mek thu sawiin, bank thawktute chu bank dawr nuam tak ni tura chahin an laka lungawilohna thlente thunneitu sang zawkin an lak thu tak hle thin thu a sawi bawk.

Pu Jyoti Munna Soren, Lead District Manager (LDM), SBI Lead Bank Office Champhai chuan kalkhawmte lawmna thu a sawi hnuah quarter kalta chhunga Champhai District Bank leh Stakeholder hrang hrangte hnathawh leh hmalaknate thlirletna neih a nih bakah hmachhawpte sawiho nghal a ni.

Meeting-a tarlan a nih danin June 2022 quarter chhunga Champhai District-a bank hrang hranga pawisa dahluh leh pekchhuah tam zawng inthlauhna khaikhinna Credit Deposit Ratio/CD Ratio chawhrual chu 70.42 a ni a, quarter hmasa March 2022 quarter tawpa CD Ratio 60 % atangin 5.42% in a pung a, hei hian CD ratio tha ni tura hniam lam bituk zat 60% chu 10.42% in a khum a ni. Hemi hun chhung hian bank-ah cheng nuai 45930.60 dahluh a nih laiin bank-in pawisa a pekchhuah zat hi cheng nuai 32344.90 a ni a. 2022-2023 Financial Year chhung June thla tawp thlenga Annual Credit Plan (ACP) hnuaia hnathawhte thlirho ni bawkin, Priority Sector atana target 6884 (cheng nuai 14511.51) atangin 909 (cheng nuai 1940.06), za zela 13.36 tihhlawhtlin a ni a, Non Priority Sector hnuaia target 159 (cheng nuai 3300) atangin 71 (cheng nuai 1466.09) za zela 44.42 tihhlawhtlin a ni. Hemi quarter chhung hian Pradhan Mantri Mudra Yojana (PMMY) kaltlangin Sishu hnuaiah mi 9, Kishore hnuaiah mi 46, Tarun hnuaiah mi 17, Stand up India hnuaiah mi 7, an vaiin mi 79 te hnenah loan cheng nuai 219.57 hu pek chhuah tawh a ni bawk.

Kumin June quarter tawp thlenga Social Security Scheme hnuaia inziaklut tawh zat chu Pradhan Mantri Jan Dhan Yojana (PMJDY) hnuaiah mi 21173, Pradhan Mantri Jeevan Jyoti Bima Yojana (PMJJBY) hnuaiah mi 10304, Pradhan Mantri Suraksha Bima Yojana (PMSBY) hnuaiah mi 18506 leh Atal Pension Yojana (APY) hnuaiah mi 698 an inziaklut tling tawh a. Hemi quarter chhung vek hian Priority Sector hnuaiah Non Performing Assets (NPA) cheng nuai 4268.96 (14.77%) leh Non Priority Sector hnuaiah NPA cheng nuai 169.77 (1.43%) awmin bank chhawr tangkai dan inzirtirna Financial Literacy Campaign (FLC) Lead Bank, Mizoram Co-operative Apex Bank (MCAB), HDFC leh AXIS bank Champhai-te kaltlangin tum 63 neih a ni a, mi 846 te zirtirna pek an ni.

DCC thukhawmah hian bank hma la chak tawk lote hnen atangin insawifiahna ngaihthlak a ni a. ATM khawlah Rs. 500 note bakah Rs.100 leh Rs 200 note-te lak chhuah theiha a awm reng theih nana hma la turin bank branch hrang hrangte hriattir an ni a. Customer-te lo pui thuaitu tur ‘May I Help You Desk’ siam vek tura tih niin, FLC kaltlanga bank dawr dan, bank kaltlanga hamthatna awm inhrilhhriat leh security chungchang hriattur inzirtirna tam zawk neih nise tih a ni a, zirna in sang zawkahte September thla chhunga inzirtirna kalpui nise tih a ni bawk a. Bank hrang hrangte chu mipuite hnena bank chhawr tangkai dan inzirtirna financial literacy camp thla tina vawi 2 tal nei tura hriattir an ni a, mipuiten Social Security Scheme an chhawr tangkai theih nan a tul anga hmalak nise tih a ni a. Heng bakah hian Bank leh ATM venhim chungchang sawiho niin security report ngaihthlak a ni bawk.

June 2022 quarter tawp thleng khan Champhai District-ah Bank branch hrang hrang 17 a awm a, Public Sector Bank 5, Private Sector Bank 5, Regional Rural Bank 6 leh State Cooperative Bank 1 te bakah ATM 9, Business Correspondent 8, CSP 1 leh IPPB hnuaia Banking Touch Point 26 te a awm a ni. Financial Literacy Centre 2 (Lead Bank Office, SBI Sponsored leh Champhai Financial Literacy Centre, MCAB Ltd.) te awm bawkin, Champhaiah RSETI (Rural Self Employment Training Institution) hranpa a awm loh avangin RSETI Aizawlin a vil a ni.