1739/2022-2023
Siaha, August ni 29 2022 : Vawiin chawhnu dar 01:00Pm khan MYA Multipurpose Hall, New Siaha-ah Mizoram Sawrkar Flagship Programme - Socio Economic Development Programme(SEDP) khuhhawnna hun hman a ni. He SEDP khuhhawnna programme hi Pu Donny Lalruatsanga, Additional Deputy Commissioner chuan a kaihruai a, Rev. Dr. FC. Beichô chuan hunserh a hmang a, Maraland Octave ten opening song mawi takin an rem a ni.

Vawiin Siaha District SEDP khuhhawnna hmanpuitu khuallian Pu N. Viakhu, Chairman MADC chuan thusawiin, Mizoram sawrkar flagship programme SEDP kaltlangin hma nasa tak lak tawh a ni a, infrastructure lamah ramchhung kawngpui pawimawh zual siam nan te, ramri lam kawng laih hmanhmawhthlak zualna-ah te, Zirtirtu indaihloh zual phuhruk nan te leh thil dang tam takah hman a ni tawh a ni, a ti. Sawrkar chuan he Family Oriented SEDP hi sem a tumna a rei tawh a, mahse a kar lakah harsatna hrang hrang heng - Covid-19 hripui leng te, Ramri buaina te leh Khawchhak lam unau raltlante avangin duh ang leh tum hunah a sem hman ta lo a ni. Sawrkarin hripui leh buai karah kan nitin mamawh ei tur, buhfai, gas, electric, tui,.etc te erawh chatlak lova min pek theih reng te hi a lawmawm hle a ni tiin, tuna Family oriented SEDP pawh chhungkaw 60,000 hnenah cheng 50,000 theuh a hmatawng a sem tum a ni laiin CSS sum release thut lo ngaih tak avanga cheng 25,000/- a sem a lo ni ta a ni, a ti. Cheng 3,00,000 erawh kan la dawng vek tho dawn a ni tiin, a thawhkhatna a dawng zawng zawng ten a la dawng ve lo, lo la dawng zel turte tana entawntlak leh rinawm taka thawka hlawhtlinpui theuh tura chahin a sawm hlawm a ni.

Pu Abraham Beirazi Khithie, Member Secretary, District SEDP Committee leh Project Director, DRDA ni bawk hnen atangin Technical report ngaithlak a ni a, 39-Siaha A/C atangin chhungkaw 1500 leh 40-Palak A/C atangin chhungkaw 1500 a thawhkhat nan thlan an ni a. AH&Vety Deptt bikah chhungkaw 2164 an ni a, Agriculture Deptt hnuaiah beneficiaries 128, Commerce & Industries deptt hnuaiah beneficiaries 435, Fisheries deptt hnuaia beneficiaries 49, Horticulture Deptt hnuaiah beneficiaries 190, Land & Resource hnuaiah beneficiaries 13, Sericulture Deptt hnuaiah beneficiaries 2 leh UD&PA hnuai atangin beneficiaries 19 te an ni a, a vaiin beneficiaries 3000 a thawhkhat nan thlan phawt an ni.

Programme kar lakah zaithiam zaite ngaithlak niin, Pi Rochuangkimi Khenglawt, SDO (S) chuan lawmthu sawiin he hun hi a titawp ta a ni.