2833/2022-2023
Champhai, the 28th November, 2022: Champhai District chhunga Bank hrang hrang kaltlanga hmalaknate thlirletin District Consultative Committee (DCC) chu vawiin chawhma dar 11:00 khan an Chairman, District Bawrhsap Pu James Lalrinchhana hovin DC Conference Hall-ah an thukhawm. He hunah hian September 2022 quarter tawp thlenga Champhai District RD Block 2 huamchhunga Bank leh Stakeholder hrang hrangte hmalakna thlirho a ni. He hun hi Lead District Officer (LDO) Pu Siddharaj, Manager, RBI Aizawl chuan a telpui bawk.

District Bawrhsap Pu James Lalrinchhana chuan Banker leh Line Department hotute chu Bank dawr kawngah leh Department project pawimawh tak takte mipui hrilhhriat kawnga tan la sauh sauh turin a chah a. Mipuite chawikan leh zirtir kawnga tha thlah lova tanrualpuiah sawmin, thawhhona tha vawngnung zel tum turin a fuih bawk a. Kalkhawmte chu District hmasawnna tura mi pawimawh tak takte an nih thu sawiin, anmahni mamawha dawr thintute tha taka lo dawngsawng thin turin a fuih nghal bawk.

Pu Jyoti Munna Soren, Lead District Manager (LDM), SBI Lead Bank Office Champhai chuan kalkhawmte lawmna thu a sawi hnuah quarter kalta chhunga Champhai District Bank leh Stakeholder hrang hrangte hnathawh leh hmalaknate thlirletna neih anih bakah hmachhawpte sawiho nghal a ni.

Meeting-a tarlan anih danin September 2022 quarter chhunga Champhai District-a bank hrang hranga pawisa dahluh leh pekchhuah tam zawng inthlauhna khaikhinna Credit Deposit (CD) Ratio chawhrual chu 73.98 % a ni a, quarter hmasa June 2022 quarter tawpa CD Ratio 70.42 % atangin 3.56 % in a pung a, hei hian CD ratio tha ni tura hniam lam bituk zat 60 % chu 13.98 % in a khum a ni. Hemi hun chhung hian bank-ah cheng nuai 45,687.59 dahluh anih laiin bank-in pawisa a pekchhuah zat hi cheng nuai 33,798.04 a ni a. 2022-2023 Financial Year chhung September thla tawp thlenga Annual Credit Plan (ACP) hnuaia hnathawhte thlirho ni bawkin, Priority Sector atana target 6,884 (cheng nuai 14,511.51) atangin 2,643 (cheng nuai 4,033.80), za zela 27.79 tihhlawhtlin a ni a. Non Priority Sector hnuaia target 159 (cheng nuai 3,300) atangin 330 (cheng nuai 2,265.74) za zela 68.65 tihhlawhtlin a ni. Hemi quarter chhung hian Pradhan Mantri Mudra Yojana (PMMY) kaltlangin Sishu hnuaiah mi 38, Kishore hnuaiah mi 183, Tarun hnuaiah mi 39, Stand up India hnuaiah mi 3, an vaiin mi 263 te hnenah loan cheng nuai 938.4 hu pek chhuah a ni bawk.

Kumin September quarter tawp thlenga Social Security Scheme hnuaia inziaklut tawh zat chu Pradhan Mantri Jan Dhan Yojana (PMJDY) hnuaiah mi 22,732; Pradhan Mantri Jeevan Jyoti Bima Yojana (PMJJBY) hnuaiah mi 65,061; Pradhan Mantri Suraksha Bima Yojana (PMSBY) hnuaiah mi 22,612 leh Atal Pension Yojana (APY) hnuaiah mi 931 an inziaklut tling tawh a. Hemi quarter chhung vek hian Priority Sector hnuaiah Non Performing Assets (NPA) cheng nuai 5,459.38 (16.68%) leh Non Priority Sector hnuaiah NPA cheng nuai 188.69 (1.41%) awmin bank chhawr tangkai dan inzirtirna Financial Literacy Campaign (FLC) tum 44 neih a ni a, hemi kaltlang hian mi 2,500 chuangte zirtirna pek an ni.

DCC thukhawmah hian Bank hma la chak tawk lote hnen atangin insawifiahna ngaihthlak a ni a. Customer-te lo pui thuaitu tur ‘May I Help You Desk’ siam vek tura tih tha taka bawhzui anih thu ngaihthlak a ni a. Bank hrang hrangte chu mipuite hnena bank chhawr tangkai dan inzirtirna financial literacy camp tam zawk nei tura hriattir an ni a; mipuiten Social Security Scheme an chhawr tangkai theih nan a tul anga hmalak nise tih a ni a. Bank lamin pawisa thir an dawn reng theih laia a pek chhuah leh khawtuala hman chhuah kawnga harsatna awm thinte sawiho niin, DCC thukhawm chuan District mipuite chu pawisa thir dawn leh hman kawngah hlauhthawnna leh ngaihthat lohna nei lo turin a chah a; pawisa thir hman hreh lo tur leh ngaihtha taka pawm thin turin a chah nghal bawk a ni. Heng bakah hian Currency Management -Remittance chungchangte, Bank leh ATM venhim chungchangte sawiho niin security report ngaihthlak a ni bawk.

September 2022 quarter tawp thleng khan Champhai District-ah Bank branch hrang hrang 18 a awm a, Public Sector Bank 5, Private Sector Bank 5, Regional Rural Bank 7 leh State Cooperative Bank 1 te bakah ATM 9, Business Correspondent 8, CSP 1 leh IPPB hnuaia Banking Touch Point 26 te a awm a ni. Financial Literacy Centre 2 (Lead Bank Office, SBI Sponsored leh Champhai Financial Literacy Centre, MCAB Ltd.) te awm bawkin, Champhaiah RSETI (Rural Self Employment Training Institution) hranpa a awm loh avangin RSETI Aizawlin a vil a ni.

Meeting zawh hnu hian District Bawrhsap Pu James Lalrinchhana chuan DDM, NABARD buatsaih Potential Linked Credit Plan (PLP) for Champhai District 2023-2024 chu a tlangzarh nghal bawk a ni.