487/2023-2024

Champhai, the 18th May, 2023: Champhai District chhunga Bank hrang hrang kaltlanga Financial Year 2022-2023 March quarter tawp thlenga hmalaknate thlirletin District Consultative Committee (DCC) chu vawiin chawhma dar 11:00 khan an Chairman, District Bawrhsap Pu James Lalrinchhana hovin DC Conference Hall-ah an thukhawm. He hunah hian Champhai District RD Block 2 huamchhunga Bank leh Stakeholder hrang hrangte hmalakna thlirho a ni.

District Bawrhsap Pu James Lalrinchhana chuan mipuite'n Bank nihphung leh chhawr tangkai dan an thiam loh chuan banking system kalpuiin awmzia a neih loh thu leh a tum a hlawhtlin theih loh thu a sawi a. Financial Literacy Campaign (FLC) kaltlanga mipuite bank kalphung leh chhawr tangkai dan nasa zawka kalpui a tul thu sawiin, FLC chu mipui leh banker-te inzawmna tha zawk siamtu, sum neih angte tangkai zawk leh hamthatna awm angte an dawn theih nana inkawhhmuhna hmanraw pawimawh tak a ni, a ti a. Social Security Scheme-te ngaihpawimawh a tul thu sawiin, hemi kawnga bank hma la tha tawk lote chu inenfiaha theihtawp chhuah turin a chah a. Loan dil leh buaipui kawngah Line Department leh Bank Branch-te thawhhona tha a awm a tul thu sawiin, loan latute pawh mawhphurhna an neihte hriaa tha taka loan rul thin turin a chah a. DCC meeting hmanga banking system-a hmasawnna tur hrang hrang sawihona leh inkawhhmuhna siam chuan rah tha a chhuah zel thu pawh sawiin, kan zavaia theihtawp kan chhuah tlan chuan hma kan sawn zel dawn a ni, a ti bawk.

Lead District Officer (LDO) Pu Siddharaj, Manager, RBI Aizawl chuan Banker kalkhawmte chu Financial Literacy Campaign neih hunah scheme pawimawhte sawifiah mai duh tawk lova, mipuite'n ataka scheme an chhawr tangkai theih nana lehkha bawhzui tulte leh hnathawhna hmanruate kenga tih sak nghal zel turin a chah a. Buai tak tak ni hlawm mah se, hun awl remchang an neihte mipuite hnena bank chungchanga hriattur pawimawhte zirtir nana hmang thin turin a fuih bawk.

Pu Jyoti Munna Soren, Lead District Manager (LDM), SBI Lead Bank Office Champhai chuan kalkhawmte lawmna thu a sawi hnuah quarter kalta chhunga Champhai District Bank leh Stakeholder hrang hrangte hnathawh leh hmalaknate thlirletna neih a nih bakah hmachhawpte sawiho nghal a ni.

Meeting-a tarlan a nih danin March 2023 quarter chhunga Champhai District-a bank hrang hranga pawisa dahluh leh pekchhuah zat inthlauh dan khaikhinna Credit Deposit (CD) Ratio chawhrual chu 66.68% a ni a, quarter hmasa December 2022 quarter tawpa CD Ratio 74.56% aiin 7.88% in a tlem a; hei hian CD ratio tha ni tura hniam lam bituk zat 60% chu a khum tho a ni. Hemi hun chhung hian bank-ah cheng nuai 52399.23 dahluh a nih laiin bank-in pawisa a pekchhuah zat hi cheng nuai 34942.40 a ni a. 2022-2023 Financial Year tawp thlenga Annual Credit Plan (ACP) hnuaia hnathawhte thlirho ni bawkin, Priority Sector atana target 10213 (cheng nuai 21446.75) atangin 6168 (cheng nuai 10171.16), 47.42% tih hlawhtlin a ni a. Non Priority Sector hnuaia target 159 (cheng nuai 3300) atangin 892 (cheng nuai 5551.53), 168.19% tih hlawhtlin a ni. Pradhan Mantri Mudra Yojana (PMMY) kaltlangin Sishu hnuaiah mi 42, Kishore hnuaiah mi 194, Tarun hnuaiah mi 59, Stand up India hnuaiah mi 3, an vaiin mi 298 te hnenah loan cheng nuai 1248.63 hu pek chhuah a ni bawk.

Financial year 2022-2023 tawp thlenga Social Security Scheme hnuaia inziaklut tawh zawng zawng zat chu Pradhan Mantri Jan Dhan Yojana (PMJDY) hnuaiah mi 23520; Pradhan Mantri Jeevan Jyoti Bima Yojana (PMJJBY) hnuaiah inziaklut tawh 14571 awmin, hamthatna dawng thei tur 42847 atangin inziaklut nawn leh 6418 an awm a. Pradhan Mantri Suraksha Bima Yojana (PMSBY) hnuaiah inziaklut tawh 38367 awmin, hamthatna dawng thei tur 55783 atangin inziaklut nawn leh mi 11448 an awm a, Atal Pension Yojana (APY) hnuaiah 1041 an inziaklut tling tawh bawk. Hemi hun chhung vek hian Priority Sector hnuaiah Non Performing Assets (NPA) cheng nuai 2968.04 (13.84%) leh Non Priority Sector hnuaiah NPA cheng nuai 245.89 (1.74%) awmin bank chhawr tangkai dan inzirtirna Financial Literacy Campaign (FLC) tum 73 neih a ni a; hemi kaltlang hian mi 2894 chuangte bank chhawr tangkai dan chungchang zirtirna pek an ni.

Vawiin DCC thutkhawmah hian Tuipui khuaa banking service tihchangtlun dan tur chungchang ngaihtuahho a ni a, HDFC Bank lamte inhuamna lawmawm tiin, hemi kaltlanga Business Correspondent (BC) dah a nih theih nana hmalak ni se an ti a. Heng bakah hian bank-in sum a kawl theih zat Currency Management -Remittance leh Security chungchangte sawiho niin, bank chungchang hriatzau nan RBI quiz, district level-a bultan a nih thute tarlan a ni bawk.

Financial Year 2022-2023 March quarter tawp thleng khan Champhai District-ah bank branch hrang hrang 18 a awm a, Public Sector Bank 5, Private Sector Bank 5, Regional Rural Bank 7 leh State Cooperative Bank 1 te bakah ATM 9, Business Correspondent 10, CSP 1 leh IPPB hnuaia Banking Touch Point 21 te a awm a. Financial Literacy Centre 2 (Lead Bank Office, SBI Sponsored leh Champhai Financial Literacy Centre, MCAB Ltd.) te awm bawkin, Champhaiah RSETI (Rural Self Employment Training Institution) hranpa a awm loh avangin RSETI Aizawl-in a vil a ni.