Vawiin khan State Sports Coaching Centre Govt. Complex ah Basketball leh Volleyball court thar chu Pu Lalzirmawia Chhangte, Director, Sports & Youth Services chuan a hawng. Hawnna inkhawm hi Pi K. Lalliantluangi, Joint Director, Sports & Youth Services chuan a kaihruai a.

Pu Lalzirmawia chuan hetiang hmasawnna tha tak mai basketball leh volleyball court kan hawng thei hi a lawmawm a. Sports & Youth Services department hian sports vangin mi hriat a hlawh ber a, mahse thalaite hmakhua ngaih leh an hmasawnna tur ngaihtuah pawh department hnathawh pawimawh tak a ni a ti. Sorkar in theihtawp a chhuah a khelmual tha te court te leh infiamna hmanraw dang a chhawp chhuah te hi duat tak leh uluk taka enkawl turin a chah a, infiammite chu heng thil te hi tangkai tak leh hmasawn nan a hmang turin a fuih a ni.

He court 2 te sak nana sum sen Rs. 45 lakhs hi National Thermal Power Corporation Limited chuan an tum a, volleyball court sak nan hian Rs. 10.37 lakhs, basketball court sak nan hian Rs. 31.32 lakhs leh tui dah khawlna ft 10 bial leh ft 16 a thuk sak nan hian Rs. 3.27 lakhs sen a ni.

Court hawn lawm nan hian Luangmual Complex leh Chawlhhmun te chuan friendly match an khel a ni.