NLUP hmalakna a Rs. 36.86 crore vel hmanga bawnghnute atanga eitur chi hrang hrang siamna tur Indegenous Milk Processing Plant atana khawlte chuan Thuampui venga MULCO hmun a thleng tawh.

Tukin zing dar 8 khan Aizawl District Addl. D.C. leh District NLUP Nodal Officer ni bawk Pu Lalchungnunga leh Chief Media Officer, Pu David L. Thangliana NLUP Media Cell te chuan MULCO hi a hmunah an tlawh a, Dr. Lalhmingthanga, Managing Director, MULCO leh a thawhpuiten an lo dawngsawng.

NLUP bawng sem hma a bawnghnute litres 5000 vel nei thin khan NLUP bawng sem atanga reilote ah bawnghnute litres 8000 an la khawl ta a, hei pawh hi bawng neitu zawng zawng nilovin, engemaw zat chu an lak sak theilo zawk tih MULCO Managing Director chuan a sawi.

Bawnghnute a tam tak em avangin a chuang bang atang hian eitur, Rosgula, Gulab Jamun, Dahi, Paneer, Ghee, Lasi, leh thil dang an siam chu phailam aia man tlawm zawkin an hralh chhuak mek a, phailam siam aiin mi tam takin tui zawk leh tha zawkah an ngai a, inneihni, lungphun atan leh zuar duh te chuan MULCO hnenah hian a order theih tih Pu Lalhmingthanga chuan a sawi.

NLUP atanga khawl tharte hian hna an thawh theih hunah chuan Mizoram hmun hrang hrang bakah India ram hmun dangah thawn chhuah anih theih beiseiawm a ni. Heng khawlte hi February 2015 chawhnu lamah chuan hman tan anih an beisei bawk.