No.5313/2020-2021
Dt. 20.09.2020 khan Bawngkawn Traffic Point (Sairang Junction)-a Police thenkhat ten mi pakhat kut an thlaklai video clip chu social media hrang hrangah thehdarh a ni a. Hemi chungchang hi rang taka enfiah nghal niin hetiang hi thil thlen dan chu a ni.
Dt. 20.09.2020 chawhnu dar 12:30 vel khan truck pakhat, registration no. MZ-043320 Thuampui lam atanga rawn tlan phei chuan Bawngkawn Traffic Point (Sairang Junction) rawn tlan pelin Ramhlun lamah kal a tum a. Hemi hunlai hi lirthei lian tan tlan phal loh hunlai a nih avangin Traffic Police-te chuan tihdin tumin whistle-te hamin ding turin signal an lo pe a. Amaherawhchu, truck driver hian motor tiding lovin Ramhlun lam panin a tlan tlang a. Traffic Police duty-lai pakhat chuan truck tlan tlang chu umzui nghalin, Ramhlun Industry Peng-a Traffic duty-te pawh lo tiding tura hrilh nghal an ni. Ramhlun Industry Pengah hian lo tihdin niin Bawngkawn lamah let tir leh a ni a. Bawngkawn Traffic Point-ah hian Traffic Police duty-ten thil awmzia sawipui an tum laiin police-te leh truck driver-te chu an thu inhmu lovin an inhnial a. Driver hian lockdown a nih avang leh Pathianni a nih avanga ‘No Entry’ awm lova a ngaih thu te, police-te signal a hmuh loh thu leh whistle ri pawh a hriat loh thu a sawi a, hei bakah hian Traffic Duty an awm loh thu sawiin, hei hian kawng sira ding police-te leh traffic point-a duty rengte a tilungnilo hle a ni. An inhnial chungchang ngaihven turin Bawngkawn Police Station duty-te pawh a hmunah kal nghalin, heta an inhnialna avang hian police action duhawm lo tak a thleng ta a ni.
Hemi chungchangah hian Police pahnih, Aizawl DEF-a mi leh Traffic Unit-a mite chu suspend an ni a. Enquiry lak mek niin Departmental Proceedings kalpui nghal a ni ang. MZ04 3320 khalhtu hi Govt. of Mizoram, Dept of Disaster Management and Rehabilitation Order No. B.13021/101/2020-DMR-Pt-III Dated 31.08.2020 No. II (2) leh Superintendent of Police Traffic No. RO/TRF/SP-Noti-7/08/514 Dt. 31.7.2020 thuchhuah bawhchhiat avangin Sec 179 MV Act, 1988 leh Sec 5(9) of The Mizoram (Containment & Prevention of Covid-19) Ordinance 2020 hmanga hrem a ni bawk.
