No108/2021-2022

Aizawl, the 12th April 2021: Vawiin chawhnu khan Aizawl DC’s Conference Hall-ah Dr Lalhriatzuali Ralte, Aizawl District kaihruaina hnuaia Covid-19 hridanna pekchhuah mek chungchang te thlir ho a ni a. Aizawl District chhung bikah Covid -19 Vaccine tam zawk a lo thlen hun atana hmalakna kalpui dan tur te pawh rel a ni.

Dr.Lalhriatzuali chuan Vaccine chak zawka pek chhuah chu central sawrkar leh state sawrkar duhdan a nih angin tan lak a ngaih thu a sawi a. Aizawl Municipal Corporation (AMC) huam chhungah Vaccine pekchhuahna hmun, Session Site 13 awm mek chu Vaccine drive nasa zawka kalpui a nih dawn chuan a tawk lo a; tam zawk siam belh tum a ni a ti. Session Site awmna vengchhung Local Council te pawh Hridanna pe chhuaktu Medical Team te a tul ang anga lo tanpui turin a sawm nghal bawk a ni.

Vawiina Covid-19 Vaccination meeting-ah hian Pu Lalrinenga Sailo, Mayor, AMC pawh a tel a. Mayor chuan Aizawl mipuite himna tura hmalaknaah chuan AMC chuan tihtur a nei tih a sawi a. Councillor zawng zawng te pawhin an ward chhunga hridanna kalpui mek hi an ngaihven reng thu sawiin an tangkaina tur apiangah engtiklai pawhin chhawr theih in an awm reng a ni a ti.

Aizawl District Covid-19 Vaccination chungchang sawihonah hian State Immunization Officer(SIO), District Immunization Officer(DIO) - Aizawl West leh East, CMO – West leh East te leh Incident Commander te hnen atangin hmalakna kal mek te bakah vaccine tam zawk a lo thlen hun atana lo inbuatsaih lawkna te ngaihthlak a ni. Dr Lalzawmi, SIO in report a pek dan chuan Covid hridanna hi April thla chhunga Second Dose dawng tur leh Voter ID behchhana chhinchhiah tawh kum 45 chunglam, hridanna la tur te tan 2 lakh doses chah mek a ni. Vaccination drive chu chak taka kalpui mek a ni tih sawiin vawiinah pawh Mizoram pumpuiah session 44 kalpui a nih thu a sawi a. Tunah dinhmunah Vaccine chu naktuka pek chhuah tur chiah a awm tawh a. Vaccine chah mek pawh a lo thleng thuai tura beisei a ni.

Aizawl District chhung, AMC pawnlamah chuan CHC leh PHC a Medical Officer te ruahmanna angin hridanna hi kalpui mek a ni a. Vawina meeting-ah hian Aizawl khawchhung veng thenkhatah te Session site engemaw zah siam belh tura ruahmanna siam a ni a. Vaccinator hna thawk turin Nursing Institution engemaw zah atangin Volunteer tam takin hming an rawn pe tawh bawk a ni.