No.3450/2021-2022

Aizawl 17th December, 2021: District Task Force for Immunization (DTFI), Champhai District chu vawiin khan District Bawrhsap Pi Maria C.T Zuali kaihhruaiin Doctor's Lounge, District Hospital Champhaiah Covid-19 hri danna pek dan leh National Immunization Day 2022 Microplan chungchang relin an thukhawm.

He hunah hian District Bawrhsap Pi Maria C.T Zuali chuan thingtlang mite hriselna a that tawk loh thu sawiin, ngaihsak leh ngaihven reng an ngai a ni, a ti a. Hri danna leh damdawi tha ei a pawimawh zia sawiin, mihringte hi thlai ang thovin chaw tha leh damdawi tha kan ei that chuan kan than a thain kan hrisel em em a ni, a ti. Mihring hriselna tura mawhphurhna pawimawh tak chu nu te kova innghat a nih thu sawi bawkin, nu ten kan chhungkua kan uap a, kan fa fate kawng tir renga kan ngaihven zui reng a ngai a ni, a ti bawk. Pi Maria C.T Zuali chuan Doctor-te chu khua leh tuite hriselna tura hna thawk an ni tih hre thar reng turin a fuih bawk.

CMO Dr. R.Lianmawia chuan Champhai District chhungah hri danna chi 11 pek chhuah mek a nih thu sawiin kum thar January ni 25 atangin kum 5 hnuai lamte hnenah zeng hri danna a ruala pe chhuak tura ruahmanna kalpui mek a nih thu a sawi a. Undivided Champhai District huam chhunga Covid-19 hri danna pek chhuah dan tarlangin, 'Har Ghar Dastak Abhyan' kalpuiin in tina lutin hri danna pek a nih thu a sawi a. Hri danna la thei tura ngaih la la lo mi 3,004 an la awm mek a, an zinga 2,026 chu sakhuana leh chhan dang avanga la duh lo niin 178 te chu dam lohna avanga la la lo an ni, a ti a. Mi 159 te chu hriaua inchiu hlau leh 641 te chu chhan dang avanga la duh lo te an nih thu leh, hri danna pek zingah Myanmar atanga Mizorama ral tlan mi 3,856 te bakah, Home leh Jail-a pek mi 1,304 an awm thu a sawi lang bawk.

Meeting-ah hian nakum January ni 25, 2022 a National Immunization Day hman dan tur chungchang Microplan sawiho niin pawm a ni a. January ni 25, 2022 hian National Immunization Day pualin Intensified Pulse Polio Immunization (IPPI) neih tur a ni a. CMO Champhaiin a enkawl Champhai District thenhran a nih hma huam chhungah transit point 10, vaccination boot 161 leh team member 483 ten hri danna hi a rualin an pe chhuak dawn a. Booth Day January 25 bakah a hnu nithum chhung chu in tina lut chhuakin hri danna la leh la lote enfiaha pek chhunzawm a ni ang.

Hri danna chu zaah za pek chhuak ni thei lo mah se, a tam thei ang pe chhuak tura tan lak leh nise an ti a, hri danna la duh lo te'n an lak theihna tura hmalak dan turte an sawiho bawk a ni.