No.3451/2021-2022

Aizawl the 17th December, 2021 : Nimin ni 16.12.2021 khan School Education Minister Pu Lalchhandama Ralte chuan Lungleia School Education Complex leh Guest house sak mekte a tlawh.

Minister chuan chhawng tin a fankual hnuah hnathawktute leh Department Officer-te chu hnathawh zel dan tur leh room hrang hrang luah dan tur a sawipui. School Education Complex sak tharah hian District Education Office, Sub-Divisional Education Office, Adult Wing te, Samagra Shiksha District Project office te leh MBSE Regional office te dah tum a ni. Floor hnih chu lirthei dahna tura ruahman a ni a, zirtirtute thlenna tur room te, conference hall te a awm bawk. School Education Complex hi January 2022 ah zawhfel tum a ni a. Tun dinhmunah zaa 97% zawh tawh a ni.

Minister chuan hnathawktute chu theihtawp chhuah zel turte, office hrang hrang mamawh tui leh eng hnianghnar dan turte a sawipui a. He building thar hi luah theih a nih hunah chuan thawktute tan pawh hnathawh a phurawm lehzual dawn tih sawiin ruahman anga hna thawk zel turin a fuih a ni.

Minister-in Lunglei Education Complex a tlawhnaah hian Pu Lalthangbika, MBSE Secretary, Pu James Lalrinchhana, Director School Education, Pu Lalhmachhuana, SPD Samagra Shiksha leh Lungleia School Education Department officer ten an țawiawm a ni.