1188/2024-2025

Dated Saitual the 15th July 2024: Vawiin khan Saitual Town Sanitation Committee chu Dr. Lalngura Tlau, Saitual Bawrhsap leh Saitual Town Sanitation Committee Chairman ni bawk hovin DC Conference Room - ah an thukhawm a, he hunah hian Saitual town chhunga hoarding tarte enkawlzui dan tur bakah faina chungchanga hma lak dan tur hrang hrangte sawiho a ni a. Meeting ah hian Town sanitation committee member te an kal tha hle a ni.

Chairman Dr. Lalngura Tlau chuan kalkhawmte hnenah lawmthu sawiin Saitual Town chu faina kawngah khaw entawn tlak tak an nih thu leh Dristrict hrang hranga fai inelna ODF+ ah hial puan a lo ni tawh chu lawmawm a tih thu a sawi a. Kalkhawmte chu tan la thar leh tura chahin, tun hun hi bul tan tharnaa ngaia nasa lehzuala hmalak dan tur kawng awm thei apianga infinchhuah zel turin a sawm a ni.

Meeting-ah hian hoarding tarna hmun hrang hrang enfiah leh dah belh chungchangte, Independence - Day 2024 denchhena faina hapta neih dan turte, road protection squad-te hmalakna tuaithar leh dan tur chungchangte, kum khata tum 4(quarterly) tal faina hapta hmante, tawih thei leh tawih theilo thliar hran a nih theih nana hmalak dan turte, Nodal Department lam indaihlohna chungchanga hmalak dan turte, khawpui chhunga thir hrui hrang hrang in zam hnawk chin fel dan turte bakah Govt. Saitual College-a plastic Shredder khawl hman lohva awm mek chu hman theih tura hmalak dan turte sawiho a ni.

He hunah hian Pu Lalrohlua, Urban Surveyor pawhin department hmalak tawh dante report pein tun dinhmunah bawlhhlawh sawngbawlna hmun pawh department lam hotute’n an enfel tawh thu leh hmalak zui mai theih a nih thu te, Solid Waste Management Centre hmun atana hmun hnih ruahman sa a awm thute, AMRUT hnuaia khawpui chhunga park pahnih, Saihmar YMA Park leh Keifang Centenary Park-te cheina atana hmalak mek chungchangte bakah hmalak zel dan turte a sawi lang bawk.