1187/2024-2025

2024 Vawkhniahzawn thla ni 15: Vawiin khan Lunglei District Deputy Commissioner Pu R. Lalṭhazuala kaihhruaiin Lunglei DC Conference Hall-ah Lunglei District chhunga department hrang hrangte hna thawh leh dinhmun inhrilh hriat nana inkawm hona buatsaih a ni.

Lunglei District Bawrhsap Pu R. Lalṭhazuala chuan Lunglei District chu Mizorama District lian ber dawttu a nih angin a enkawlna kawngah sawrkar department hrang hrangte nena thawh hona ṭha tak neih a pawimawh dawn tih sawiin, department hrang hrangte chu thawh hopuiah a sawm nghal a. Lunglei District hmasawnna tur leh mipuite tan zau zawka rawngbawl hna thawh a nih theih nan department hrang hrangte hna thawh leh dinhmun te hriat chian a ngaih thu sawiin, department hrang hrang hna thawh a inang lo va, chu'ngah chuan department-te dinhmun leh harsatnate inhriatpui tawn a, lang tlang leh ṭha zawka hna thawh a nih theih nan hma lak a ṭul a ni, a ti a. Department-te harsatna hrang hrang inhriatpui tawnna aṭangin a sut kian dan turah hma lak ho theihna a awm a beisei thu a sawi.

Department-te hna thawh inhriattirna hun hi thawh li-a buatsaih tura ruahman a ni a. A ni khatna vawiin chawhma dar 10:30 leh chhun dar 12:30 inkar chhung khan office 15 - Senior Chief Medical Officer, District Education Officer, Sub-Divisional Education Officer (North), Sub-Divisional Educational Officer (South), District Programme Officer (WCD), District Social Welfare Officer, District Child Protection Officer, Project Director DRDO, Block Development Officer Lunglei, Superintending  Engineer (PHED), Senior Medical Superintendent (Civil Hospital), District Local Administration Officer, Principal (Nursing School), District Sports & Youth Officer leh Principal (State Institute for Rural Development & Panchayati Raj) te'n powerpoint presentation hmangin an department dinhmun te an tar lang a. Chawhnu dar 1:30 leh dar 3:30 inkar chhungin office 7 - Superintending Engineer (PWD), Superintending Engineer (P&E), Project Manager (NHIDCL), BSNL, Airtel, Jio leh Executive Engineer (PWD Building Project Division) te'n hun an hmang ve thung a. Naktuk khian chawhma lamah office 11 leh chawhnu lamah office 22 te'n hun an hmang ve leh thung ang.

He hunah hian Additional Deputy Commissioner pahnih - Pu James Miahlung leh Pi Rochuangkimi Khenglawt te'n Bawrhsap hi an ṭawiawm a. Department-te harsatna hrang hrang chin fel dan tur leh ṭha zawka hna thawh dan tur rawtna hrang hrangte sawi ho a ni bawk.

Attachment

  • Loading attachment...