Vawiin khan Lawngtlai Bawrhsap Pu J. Hmingthanmawia chuan Lawngtlai District Jail a tlawh a, Chief Minister thilpek leh thuthawnte Jail tang mekte hnenah a hlan.
Pu J. Hmingthanmawia chuan Christmas alo thlen hian Jail-a hun hmang mekte a hriatreng thin thu a sawi a, Bethlehem dai reha bawngina Lal Isua lo piang, Khawvel mihringte Chhandamtu ang mai khan vawiina Jail hmun khawhar taka hun hmang mekte pawh hi an chhungkaw tan te, midangte tan pawh malsawmna thlentu ropui tak an ni thei a ni a ti. Chuti ang mi ni ngei turin Jail tang mekte chu Jaila an awm chhunga insiam tha a mithar, mite tana malsawmna bulpui nih zawk tum theuh tawh turin a fuih a ni. DC hian Jail tangte Christmas hman nan thilpek Pawisa a hlan bakah jail tangte in fiam nan Volley Ball set a pe a, Mizoram Chief Minister Pu Lal Thanhawla Christmas thuchah leh cheng 1500 chu Chief Minister aiawh in a hlan nghal bawk a ni.
Bawrhsap tawiawmtu Rev. B. Zazawna LIKBK Associated General Secretary Jail a tang mekte hnenah hian pathian thu sawina hun a hmang bawk.
Lawngtlai District Jail hi mipa 53 leh hmeichhia 42, an vaiin mi 95 tan theihna tura ruahman a ni a, tun dinhmunah mipa vek tang neiin, Under Trial Prisioner(UTP) 7 leh Simple Imprisonment(SI) 3 an vaiin mi 10 an tang mek a, thawktu hi Superintendent leh Staff Nurse pakhat telin mi 23 an awm mek a ni.
