Tukin zing dar 5 vel khan Lawngtlai III, Helipad bul maia chhungkaw pali luahlai, Pi Zothanmawii Assam Type in chu a chim a, vanneih thlak takin mihring thi leh hliam an awm lo. He inchim hnu reiloteah Lawngtlai Bawrhsap Pu J. Hmingthanmawia chuan a tlawh nghal a ni.

Pu J. Hmingthanmawia hian, chhiatna tawktute chu sawrkar atanga tanpuina awm thei ang ang ngaihtuah sak an nih tur thu sawiin, a rang thei ang bera hmalak ani tur thu a sawi a. In chim thianfaia hnatlangte thingpui lumna tur Rs 2000 a pek bakah Silpauline engemawzat a pe bawk.

Pi Zothanmawii in hi a chung ber kawngpui an chu Pi Darrimawii ten an luah a, eichawp dawr an siam nghal a ni. Chumi hnuai ah chu mi pahnih in in luah sema chumi hnuai leh chu mi pakhatin a luah bawk a, an vaiin chhungkaw pali an cheng a ni. In chim hian a thlanga in chu a delh thla a, he in pawh hi Pi Zothanmawii te in tho niin hetah hian an chhungkua an cheng nghe nghe a ni.

He chhiatna thleng vanga bungraw chhiate hlut zawng hi hriat mai theih a la nilova, in chim chung ber luahtu Pi Darrimawii chuan, eichawp dawr an siama bungraw awm mek hi nuai khat man hu vel a nih thu sawiin, a bak chhungkaw bungrua hote erawh chu hriat mai theih a la ni lo a ni.

Bungraw chhiate senghawi leh in thiat turin Lawngtlai III leh veng hrang hrang atanga mi tlawmngai kalkhawmte an thawkchhuak nghal a, chhun lamah pawh Lawngtlai III Branch YLA leh VC chuan hnatlang ko nghalin nilengin an thawk a ni.

Nilai zan leh nizan ruahpui nasa tak avang khan Lawngtlai khawchhung hmun dangah pawh leimin leh leikhi report a awm nual a. Heng hmun hrang hranga lei che te hi Bawrhsap Pu J. Hmingthanmawia chuan Pu Lallawmawma, SDO Sadar leh Disaster lama thawktute tirin an tlawh kual hlawm a ni.