No.3582/2021-2022

Aizawl, the 7th January, 2022: Vawiin khan Serchhip Bawrhsap Pu Kumar Abhishek, IAS chuan tunhnaia NAAC Grade A hmu thar Government Serchhip College chu an hlawhtlinna lawmpuina hu DC Meeting Hall ah a buatsaih sak.

He hunah hian Pu Kumar Abhishek chuan, Serchhip College in India rama College tha berte zinga mi ni phak khawpa hma a sawnna kawnga thawktu zawng zawngte a lawmpui tak zet tih sawiin, district tan hmasawnna ropui leh chhuanawm tak a ni, a ti a. Mizoram hmun dangte leh state dang atang pawha rawn pan tlak zirna in tha a ni tawh a ni, a ti. Hma lam pan zel tum tlat tura fuihin, an mamawh an ngaihtuahpui theih chi apiangah pui turin an inhuam reng tih a hrilh a ni. Bawrhsap hian lawmpuina thuziak mawi tak chu Principal Pu Lalremsiama hnenah a hlan a ni.

Pu Lalremsiama pawhin thusawina neiin, Bawrhsapin lawmpuina thilpek hlu tak mai a pe chu lawmthu a sawi a. College in an mamawh a hnena an thlente theihtawp chhuaha a ngaihtuahpui tawh thinnaah lawmthu a sawi bawk a ni.

Government Serchhip College hi December, 2021 thla tawp lam khan National Assessment and Accreditation Council (NAAC) Peer Team ten endikna an rawn nei a, 4.1.2022 khan an endikna report tichhuakin tehna chi 7 ah 3.18 point hmua Grade A an kai thu an rawn hrilh a, he grade hi kum 5 chhung a dam dawn a ni.

Vawiina bawrhsapin lawmpuina a hlannaah hian Pu Lalmuansanga Ralte, Addl. DC, Pi C. Laltleipuii, SDO, Sadar leh College aiawh Professor te an tel a ni.