No.3581/2021-2022
Aizawl the 7th January, 2022: Vawiin khan Nehru Yuva Kendra Sangathan (NYKS), Mizoram buatsaihin Art & Culture Hall, Lungleiah “Patriotism and Nation Building” tih thupui hmangin thupui thlan sa hmanga thu insawisiakna State Level Declamation Contest neih a ni. He intihsiakna, Republic Day 2022 denchhena buatsaih ah hian Lunglei N bialtu MLA leh MYC Chairman ni bawk Dr Vanlaltanpuia chu khuallian niin Lunglei SDO (S) Pi C. Lalduhzuali chu khualzahawm a ni.

Vawiin program NYK Deputy Director (OSD) & District Youth Officer, Lawngtlai Pi Mercy Sellate kaihhruaiah MYC Chairman Dr Vanlaltanpuia chuan thalaite hmakhua ngaia an tan intihsiakna tha tak buatsaihtu NYKS Mizoram chu fakawm tiin an chungah lawmthu a sawi a. Mizo thalaite hmasawnna turin MYC chuan theihtawp a chhuah zel dawn a ni tiin MYC in kum danga alo kalpui tawh thin Online IAS Coaching pawh chhunzawm leh thuai anih tur thu a sawi a. Mizo te zingah Central Service, a bik takin IAS tling kum tam tak kan awm tawhlo chu pawi a tih thu sawiin India rama office pawimawh tak takte luah ve thei turin Mizo mipuite thapui thawha kan tan tlan a tul takzet a ni, a ti a. Thalai kalkhawmte tana fuihna thu sawiin MYC Chairman chuan an zirlai mai piah lamah an hawiher ti zau a, tawng chungchangah pawh thiam taka English leh Hindi hmang thei tura inzir tur leh, zirna leh hna zawnna leh eizawnna kawng hrang hrangah pawh hnam dangte el phak tum turin a chah a ni.

He huna khualzahawm Lunglei SDO (S) Pi C. Lalduhzuali pawhin thu sawiin thalaite chu ram siamna kawnga hlawk taka tha thawh theitu an ni tiin zirlai kalkhawmte chu chu tum mumal tak nei a, ram leh khawtlang tana mi chhawr tlak ni tura tan la turin a fuih a ni.

Thupui insawisiaknaah hian Mizoram District paruk atangin District level intihsiaknaa pakhatna te telin, "Patriotism & Nation Building - Together We Grow, Together We Prosper, Together We Try, Together We Build a Strong and Inclusive India" tih thupui hmangin sap tawngin thu an insawisiak a ni.

Pu Gen Khan Do, SRO Art & Culture Lunglei, Pi C. Lalremruati, Lunglei DIPRO, Pu C. Lalhmangaiha, Leitlang Pictures leh Pi Jacinta Colney, HPC Lunglei te chu Judge niin declamation contest hi an endik a ni.

Mizoram State Level Declamation Contest- ah hian Lalrempuia, Lawngtlai District chu pakhatna niin Rs. 25,000/- leh certificate a dawng a, Mizoram aiawhin India Level Contest, Delhi-ah a tel zui dawn a ni. Beihrochu Hralachho, Siah District chu pahnihna niin Rs. 10,000/- leh certificate dawngin Haris Lalpekhlua, Aizawl District chu pathumna niin Rs. 5000/- leh certificate a dawng a ni.