No.3580/2021-2022

Aizawl the 7th January, 2022: Vawiin chawhma dar 11:00 khan District Task Force on Covid-19 Vaccination, Khawzawl District chu an Chairman Pu C.C. Lalchhuangkima, Deputy Commissioner ni bawk hovin DC Conference Hall-ah an thukhawm a, Khawzawl District chhunga kum 15-18 inkarte chu January ni 10 atangin Covid-19 vaccine (Covaxin) pek tan nise tiin an rel.

Meeting-ah hian Bawrhsap Pu C.C. Lalchhuangkima chuan kum 18 chunglam Covid-19 vaccine pek tawh dan report tarlangin, Khawzawl District chhungah Covid-19 vaccine 1st dose la tawh mi 22,080 an awm laiin chhan hrang hrang vanga 1st dose la duh lo mi 1561 leh, 2nd dose la duh lo mi 2666, an vaiin mi 4227 lai an awm chu thil pawi tak a nih thu a sawi a. Vaccine la lo te zingah sakhuana vang leh social media a thu belhchian dawl lo thehdarh awih vanga vaccine la duh lo an tam a. Anni bakah Covid-19 positive mek leh taksa harsatna dang vanga vaccine la thei lo mi engemawzat an awm tih a sawi a ni. Kum 15-18 inkarte chuan kim taka Covid-19 vaccine an lak theih nan vaccine lak pawimawh zia uar taka thehdarh theuh tur leh, an hma zawna theihtawp chhuah theuh turin kalkhawmte a sawm nghal bawk a ni.

Meeting-ah hian Khawzawl District chhunga Covid-19 vaccine pek chhuah dan tur sawiho nghal a ni a. Vaccine pekchhuah hawnna, Launching programme chu Bawrhsap hovin January ni 10 (Thawhtanni) zing dar 9:00 ah District Hospital-ah neih nise, he hunah hian Khawzawl Joint VC, Joint YMA leh Khawzawl khawpui chhunga veng hrang hrang VLTF Chairman theuhte sawm nise tih a ni a. Programme zawh chawhma dar 10:00 atangin vaccine hi District chhunga Medical Officer theuhte ruahman angin pekchhuah tan a ni dawn a ni. Ruahman dan chuan vaccine hi January ni 25, 2022 ral hmaa pek zawh vek tur a ni a. Vaccine pekna hmunahte hian Covid-19 Appropriate Behaviour zawm a nih theih nan VLTF te chu duty tura ngen nise tih a ni bawk.

Khawzawl khawpui chhung bikah chuan Covaxin hi January ni 10, 2022 chawhma dar 10:00 atangin District Hospital, Zaingen YMA Hall leh Vengthar YMA Hall-ahte pekchhuah tura rel a ni a. Khawzawl District-ah Covid-19 vaccine la thei (kum 2005, 2006 leh 2007 a piang) mi 2,471 awma chhinchhiah a ni a, Khawzawl District Hospital bialah mi 1031, Kawlkulh PHC bialah mi 647, Biate CHC bialah mi 113, Rabung PHC bialah mi 191, Sialhawk PHC bialah mi 195 leh Khawhai PHC bialah mi 294 te an awm a ni.

Meeting-ah hian DC Office-a Officer-te, Dr. Zozikpuii, District Hospital MO, Pu K. Lalkulhpuia, NSS Programme Officer-te bakah District Education Officer aiawh leh Kohhran hrang hrang aiawhte an tel a ni.