No.3579/2021-2022

Aizawl, 7th January, 2022: Vawiin khan SAD Conference Hall, MINECO-ah Health Minister Dr R. Lalthangliana hovin State-Level Expert Committee on COVID-19 Management (SLETOCOM) an thukhawm.

Vawiina thutkhawmna kaihruaitu Health Minister Dr R. Lalthangliana chuan COVID-19 hrik chhuak thar OMICRON in min hnaihchilh tawh hle avangin a hmachhawn tura kan inpuahchah ran a ngai a ti a, Chief Minister Pu Zoramthanga nen pawh an sawi dun tawh thu sawiin a rang thei ang bera Political party leh Tlawmngai Pawl / NGO zawng zawngte nen inrawn tlanna neih an tum tih a sawi. Mizoram kan vanneihna chu rampum huapa hripuiin harsatna kan tawhin political party hrang hrangte leh tlawmngai pawl/NGO te bakah mipuite nen hruk khat vuana kan hmachhawn tlang thin hi a ni a, he hrik thar kan hmachhawnna kawngah pawh hian tumah chi-ai lova rilru fim taka kan hmachhawn tlan a tul dawn a ni a ti.

Dr R. Lalthangliana chuan JICA fund atang cheng vaibelchhe 500 man Cancer Superspeciality Hospital, Zemabawk-a sak tur pawh India sawrkara a fawng vuantu Ministry leh department pawimawh zawng zawng ten min pawm sak tawh a, a tak ram chang turin hna kan thawk thei tan tak tak dawn tawh a, hei hi kan nghahhlelh thil lawmawm tak a ni,a ti.

Vawiin thutkhawmah OMICRON variant lo hmachhawn tura inpuahchahna kawnga chetlak dan tur hrang hrang ngaihtuah a ni a, India ram pawn leh India ram chhung hmun dang atanga khualzin rawn lut/haw te sample test leh quarantine dan tur chungchangte, hri kaite enkawl dan tur leh contact tracing kalpui c hhunzawm dan turte, Home Isolation chungchangte sawiho a ni a, a rawtnate hi sawrkar thuneitu sangte hnenah thlen a ni ang.

SLETOCOM chuan COVID Appropriate Behaviou tha taka zawm hi a pawimawh thu mipuiten hre thar leh se an duh thu an sawi a, a bik takin mask vuah taimak a pawimawh thu tarlangin All Mask Campaign tharthawh leh hial a tul tih an sawi.

Khawvel leh India ram State dangin OMICRON an buaipui laiin keini chuan Delta variant kan la buaipui nasa a, hetih laia OMICRON a rawn lut a nih chuan variant lian pahnih kan hmachhawn dawn bik a ni a, mipuite pawhin a inven dan tur kan hriat sa te hi tha taka kan zawm a ngai a ni, an ti a. Thu lakna rintlak tak a awm a nih loh chuan internet a kan hmuh satliah atanga thubelhchian dawllo thehdarh lo turin mipuite an ngen bawk a ni.