Vawiin hian Serchhip DC Office tualah Ministry of Sports and Youth Affairs, Government of India Flagship Programme, Khelo India Serchhip District Level Competition chu Bawrhsap Dr. Lalrozama, IAS chuan a hawng.

Dr. Lalrozama chuan, infiamna chu taksa leh rilru hriselna atan a pawimawh avangin naupangten infiamna kawng engemaw tal ngaina se tha a tih thu a sawi a. Kan tui zawngte a inan loh theih avangin Khelo India hnuaiah hian infiamna peng hrang hrang sawm zet sawrkar laipui chuan min rawn chhawpchhuah sak a, heng zinga a engemaw berah hian naupangte chu tuiin khel se, kumin mai nilo kum dang zel atanah pawh District leh State aiawhtu tha tak nih theih tum se a duh tih a tarlang. Chutih rualin zirna hlamchhiah zawnga infiamna kalpui lo tur leh infiamnaa talent kan neihna item chu zirna peng pakhat, kan tuina subject anga zir turin intihsiak tura kalkhawm naupangte chu a chah a ni. Bawrhsap hian Khelo India hian infiamna ngawr ngawr piah lamah naupangte hawiher tih zauva, nunkawng dik kawhhmuh a tum tih a sawi bawk.

Khelo India District Competition hawnna inkhawm hi Pu Lalremruata Ralte, President Serchhip District Sports Committee leh Khelo India District Executive Committee Co-Chairman ni bawkin a kaihruai a, Pu David Laldintluanga, Secretary, District Sports Committee leh Khelo India District Executive Committee Secretay ni bawk chuan report a pe thung. Tin, Nl. Lungtiawii, Member, District Executive Committee chuan intihsiak tura kalkhawm naupangte chu Oath Taking a neihpui bawk.

Khelo India District Level Competition hi vawiin leh naktuk ah infiamna chi hrang hrang 10 ah inelna buatsaih a ni ang a, naktuk tlai lam dar 3:00 pm ah a kharna hun DC Conference Hall ah neih zui nghal tur a ni ang. District Level-a ti thate hian ni 15-16 hian Aizawlah State Level Competition an hmachhawn leh dawn a ni.