No.7405/2020-2021

Tukin khan Mamit Bazar Veng te chuan Mamit Town Cleanliness Competition 2020 vengfai inelna-a lawmman pakhatna an lak lawmna hun hman a ni a. Dr. Lalrozama, IAS District Bawrhsap/Chairman District Water & Sanitation chuan khuallian niin he hun hi a hmanpui.

Dr. Lalrozama chuan Mamit Bazar veng te chu Mamit District tana faina kawnga meichher chhi chhuaktu an ni tiin Children Sanitation Club dinchhuaktu an nih bakah faina kawnga India ram dengchhuak National Awardee Pi Laltharzeli hmalakna chu fakawm a tih thu a sawi a. Faina kawnga an hmalakna chu vengdangte tan a entawntlak takzet a ni a ti.

Khuallian chuan Mamit District-in kawng hrang hrangah hmasawnna kan nei chho zela, faina mai bakah chhungkaw tinte intodelh tura tha thlah lova kal zel turin a ngen bawk a ni.

He hunah hian Pu Rodingluaia, Jt V.C Chairman pawhin thusawiin mimal inpe te leh pawl thawhhona tha tak avanga  Mamit hmun lun lai, Bazar hmunpui awmna vengin lawmman pakhatna an la thei chu a lawmpui thu sawiin an thawhrimna bakah lungrual taka ke an pen hona chu faina kawnga an tha tichaktu niin entawntlak an nih thu a sawi.

Jt. VC Chairman hian  Charkawn, Bazar veng leh Field veng Taxi Stand-a Carbage Bag a sem nghal a ni.

Vawiin-a vengfai ber lawmna hun hi Pu Lalthakima,  VCP, Bazar Veng chuan kaihruaiin  Bazar veng All NGO- atang leh endiktute bakah DUDO- atangin thusawi ngaihthlak a ni a. Hun hman zawh hian Bazar leh a chhehvel phiatfaia hnatlang neih zui nghal a ni.

Vawiin-a Bazar veng in veng fai ber lawmna hun an hmanna ah hian District Bawrhsap leh Jt. VC Chairman-te hian lawmpuina thilpek an pe a ni.