No.7406/2020-2021

Vawiin khan Lawngtlai SP Conference Hall-ah District Wildlife Crime Control Sub-Unit, Lawngtlai District chu an Chairman, Lawngtlai Superintendent of Police (SP) Pu DKS Singh, IPS hovin an thu khawm a. Tlawmngai pawl hrang hrangte nen sava veh leh sapel/ramsaa sumdawnna titawp tura hma lak dan tur an rel.

Lawngtlai SP chuan thing leh nungchate humhalh chu mihringte tih tur ve reng a nih thu leh sakhaw hrang hrang zirtirna nen pawh kal kawp tlat a nih thu sawiin, dan phal lohva ramngaw leh nungcha tichereutute chu na taka hrem theih an nih thu a sawi a. Mizoram, ram nuam tak ni si-ah phai lam nen khaikhina khaw chhung leh kalkawng dunga nungcha leh sava hmel hmuh tur vang lutuk chu inenfiah nan hman a tul a ni, a ti.

He hunah hian Lawngtlai DWCCSU Member Secretary, Chhimtuipui Wildlife Division-a Deputy Conservator of Forests (DCF) Pu Samson Thanruma chuan powerpoint presentation hmangin report a pe a. Lawngtlai District chu ram dang nena inramri (international border-a awm) a nih avangin ramsa leh a kaihnawih thil, dan phal loh chite inhlanchhawnna kal khan a ni thei tih a sawi a. Kum 2020 kum kal mekah Lawngtlai District-ah wildlife kaihhnawiha dan bawhchhiatna thil tum 7 man chhuah tawh niin, court case kal mek 2 a awm tih a sawi. 

He meeting-ah hian Central YLA, MJA, Phawngpui Photographers' Association leh tlawmngai pawl dangte nen thawh hona tha tak nei a, air gun hmanga sava veh tihreh dan tur leh sapel leh a kaihnawih dan bawhchhiatna man chhuah kawnga thawh ho dan tur leh hmalak zel dan tur rel a ni a. Kohhran leh media kal tlanga inzirtirna tam zawk buatsaih tur leh dan bawhchhia vai tura endikna uluk leh zing zawka kalpui tura hma lak tum a ni.