DIRECTORATE OF INFORMATION & PUBLIC RELATIONS, Government of Mizoram, India

No.7407/2020-2021

Vawiin khan DC Conference Hall, Mamit-ah District Level Co-ordination Committee on National Animal Disease Control Programme (NADCP) chu an Chairman Dr. Lalrozama IAS, District Bawrhsap hovin thutkhawm a ni.

Meeting-ah hian Avian Influenza chungchanga hriat tur pawimawh tarlan niin Avian Influenza chu Ar leh Sava natna a ni a, ran chi hrang hrangin an kai thei a, he natna thlentu virus chi khat H5N1 hi mihringin Ar atanga a kai chuan natna a thlen thei a, 60% laiin a thihpui theih avangin fimkhur taka hmachhawn a tul thu tarlan a ni. Avian Influenza Virus hi Centigrade degree 70-ah Darkar chanve chhungin a thi vek a, Arsa leh Artui chhum/kan hmin anih chuan mihring tan a hlauhawm loh thu tarlan a ni bawk.

He Virus hi Sava atang te, Ar damlo intawh atang te leh mihring, motor, ran chaw, hmanrua leh a dangte atangin a inkaichhawn theih a. Nat lawkna nei lova thi thut, hmai vung leh duk bakah ke duk, khawsik, Khuh, Zeng, Ar tui lai tawp thut bakah Kawthalo te-in a natna a lang chhuak thin a ni.

District AH & Veterinary Officer, Mamit chuan Avian Influenza- chungchanga an hmalak tawhna hrang hrangte report pein Mizorama hmalak dan tur tlangpui hetiang hian a tarlang :-

1) Ar, Arsa leh Archaw te Avian Influenza lenna State atanga a lo luh loh nan heng thil state pawn atanga la lut tur reng reng chuan Animal Husbandry & Veterinary Department atangin phalna an la hmasa tur a ni.

2) Ar emaw Sava emaw rinhlelhawm taka thi hmu reng reng chuan a rang thei ang berin Animal Husbandry & Veterinary Department hriattir tur a ni.

3) Natna hri hmet mit (Control & containment) tur chuan a rang thei ang bera natna hri zawnchhuah a, finfiah a tul a. Forest, Environment & Climate Change Department nen tang hoin surveillance beihpuithlak tum a ni.

4) Avian Flu chungchang mipui hrilhhriatna Public Awareness Campaign nasa zawk kalpui a ni ang. Local Council/ Village Council, NGO te nen thawhho dan tur ruahmanna siamin a theih ang ang a thawhho tura tih a ni.

5) District tina Rapid Response Team (RRT) te chu a tul huna rang taka che chhuak thei turin inringrenga awm tura hriattir an ni.

Vawiin thutkhawmah hian Mamit District-a Avian Influenza- ven dan tur chungchang sawiho niin heng Ar, Artui bakah Arsa atanga thil siam chhuah hrang hrangte State pawnlam atanga Mamit District chhunga la lut tur te chuan District AH & Veterinary Officer, Mamit District hnenah phalna lak phawt tur a ni a. He hrileng chungchang mipui nawlpuite hriat tura Awareness Campaign neih dan tur chungchang sawiho niin mipui mimirte'n Avian Influenza chungchang hi kan hriat vek theih nan District chhunga VC tin Information Centre atangin tlangau nise tih a ni bawk.

Meeting-ah hian SP, CMO, Commandant, BSF, EE, PWD, PD, DRDA, DIPRO, DFO aiawh, President, Jt.VC bakah President, Sub.Hqrs YMA Mamit- te an tel a ni.

Attachment