3952/2024-2025

Aizawl, January ni 24, 2025: Ramchhung hmun dangte rualin Beti Bachao Beti Padhao (BBBP) scheme kum 10 tlinna leh National Girl Child Day 2025 chu vawiin khan Aizawl ah pawh Dawrpui Multipurpose Centre ah hman a ni. Chief Secretary Shri Khilli Ram Meena chu khuallian a ni. He hun hi State Hub for Empowerment of Women (SHEW), Directorate of Women & Child Development-in a buatsaih a ni.

Beti Bachao Beti Padhao hi kum 2011 census ah India rama nau piang zingah mipa aia hmeichhia an tlem tak lutuk tih hmuhchhuah a nih avang leh hmeichhe fa duh lohna a nasat em avanga hmeichhe fate hum him nan leh thlamuang taka inthliarhranna tawklo a an nun chhoh theih nan Sorkar laipui chuan kum 2015 khan he scheme hi a kalpui tan a ni.

Khuallian  Chief Secretary Shri Khilli Ram Meena chuan BBBP scheme lo pian chhuah dan leh a thil tum hrang hrangte sawiin, he hmalakna hi hlawhtling tur chuan department pathum – Social Welfare & Tribal Affairs, Women & Child Development, Health & Family Welfare Department leh School Education Department te thawhhona pawimawhzia a sawi a. India ram pum nen khaikhin chuan Mizoram Child Sex Ratio dihmun a that thu a sawi rualin hmasawn ngaihna lai thenkhat a la awm a ni a ti a. He scheme hnuaia hma lo lak tawhna zawng zawngah thawktu hrang hrangte chungah lawmthu a sawi bawk a ni.

Vawiin inkhawm hi Pi Lalzarmawii, Commissioner & Secretary, SWTA, W&CD-in a kaihruai a. Pu Lalramsanga Sailo, Secretary, Sports & Youth Services leh Excise & Narcotics Department pawhin thu sawiin BBBP Mizoram Theme Song a tlangzarh. He Theme song hi LR Ruata phuah niin, "Pen zel rawh" tih a ni. Pi Zoramthangi Chhangte, Director, WCD chuan BBBP hnuaia Mizorama hmalakna hrang hrangte a sawi bawk a ni.

Vawiin inkhawmah hian Academics (STEM) leh Sports lama zirlai hmeichhia hlawhtlinna changte hnenah chawimawina hlan a ni a. Kalkhawm ten hmeichhe naupang te humhim a, thlamuang taka an lo seilen a, zirna ah leh kawng hrang hrangah thleibikna tawk lova an nun an hman chhoh theih nan a hma la turin thu an tiam a. He thutiamna (Pledge taking) hi Women & Child Development Ambassador Jennifer Lalrinzuali Renthlei, Miss Mizoram 2024 chuan a kaihruai a ni.

BBBP Kum 10 tlin lawmna pual hian district leh block level-ah inzirtirna leh inhrilhriatna ngawrh taka kalpui zui a ni ang a. Intihsiakna hrang hrang te buatsaih a ni dawn a ni.