No.5390/2020-2021
Dated Serchhip, the 24th September, 2020: Vawiin hian Serchhip DC Conference Hall ah kum kaltaa HSLC Exam-a Serchhip District chhunga hmeichhe zirlai titha thlan chhuah mi 10 te chawimawina Beti Bachao Beti Padhao (BBBP) Serchhip hmalaknain buatsaih a ni.

He hunah hian Bawrhsap Pu Kumar Abhishek, IAS chu khuallian niin lawmpuina thilpek hi naupangte hnenah a hlan a. Thusawiin khuallian chuan, nangni ho hi Beti Bachao Beti Padhao hmalakna meichher chhitute in ni a, hma hun eng tak nei, zirlai taima bik in ni a, Mizoram tan mai nilo, India ram tan pawha mi chhenfakawm takah in chhuak thei a ni. Tum fel tak neiin lehkha zir ula, zirna hi lo bansan reng reng suh u, tiin a fuih a. An zir zelna turah harsatna emaw hriatchian duh te an nei a nih chuan engtiklaipawhin Deputy Commissioner Office dawr theih renga an awm thu a hrilhin, chawimawi tlak khawpa an thawhrimnaah lawmthu a hrilh a ni.

Vawiina lawmpuina hlan zirlai naupangte leh an school kalna chu:

1. Lalrempuii D/o Lalrammawia, Marian H/S Serchhip
2. Vanrambeiseii D/o R. Lalbiaknunga, Hrangturzo H/S, N. Vanlaiphai
3. PC Vanlalzawni D/o PC Lalremsanga, Govt. Bungtlang H/S
4. Lalrinsangi Sailo D/o Samson Lalramliana Sailo, Marian H/S Serchhip
5. Malsawmsangi D/o Lalthlanmawia, PES, Serchhip
6. Lalrohlupuii D/o Zolianmawia, Marian H/S, Serchhip
7. Lalremruati D/o T. Vanlalruata, Marian H/S Serchhip
8. Rosangzuali D/o PC Zoliana, Govt. Bungtlang H/S
9. Vanlalnunhlui Sailo D/o Vanlalsailova, Marian H/S
10 Lalrinpuii D/o C. Zonunsiama, Marian H/S te an ni a.

Heng zirlai naupangte hi Academic Professor, Civil Service leh Doctor nih tum an ni hlawm a ni. BBBP hmanga lawmpuina thilpek hian Citation mawi tak leh pawisa fai Rs. 9000 a keng tel a. Lalrempuii D/o Lalrammawia, Marian H/S hi Mizoram pum Top ten a lang phak a nih avangin Citation chi hnih bakah pawisa fai hi Rs. 19000 hlan a ni thung. An citation te hi Bawrhsap hian a hlan a, pawisa erawh chu an bank account ah theuh thun sak an ni thung.

Lawmpuina hunah hian Pu Lalmuansanga Ralte, MCS, Addl. DC pawhin thusawina hun hmangin, fuihna thu tha tak tak a hrilh a. Mahni inrintawkna (confidence) chu kan thuamhnaw leh lan danah nilovin kan chhungrila kan thiamna, hriatna leh theihnaah te a awm tur a ni a. Chung thiltha tinrengte chu zirna hmanga neih theih a ni, tiin theihtawp chhuah zel turin a fuih a ni.

Lawmpuina hlanna inkhawm hi BBBP Nodal Officer Dr. Manasia Khaimeichho, MCS in a kaihruai a, BBBP Line Department aiawhten an telpui a ni.