No.5389/2020-2021

Vawiin ni 24 September, 2020 hian Pu Robert Romawia Royte, Hon’ble Minister Sports & Youth Services Department-in Khuallian niin NSS Day vawi 51-na lawmna Aijal Club-ah a hmanpui.

Minister Pu Robert Romawia Royte chuan NSS volunteers ten khawtlang leh ram tan thil tha tak tak - thing phun, thisen pek, hnuchham In tlawh, awareness hrang hrang vantlang tan buatsaih, kawngpui leh vantlang hmun pawimawh te an tifai thin chu lawmawm a tih thu a sawi a. Faina chungchangah mi dangte zirtirtu ni turin NSS volunteers te chu a chah. NSS volunteer te chu a thlawna thisen pekah hma hruaitu an ni a, kum hnih chhung a zawna Mizoram pawl hrang hrang zinga thisen a thlawna pe hnem ber an ni chu lawmthu a hrilh a, hmahruaitu an nih chhunzawm zel theih nan duhsakna a hlan bawk a ni. Minister chuan Covid-19 hripui leng mekah Sorkar, Tlawmngai Pawl hrang hrang, Kohhran leh mipuite inthuruala tanlak a pawimawh thu sawiin, NSS volunteers te leh thalaite chu kum upa te leh naupangte ngaihsaka, hripui dona kawngah thahnemngai tak leh fimkhur taka ke pen turin a sawm a ni.

Pu Robert Romawia Royte hian Sports Minister’s Trophy for Voluntary Blood Donation chu – Pachhunga University College, Govt. Hrangbana College leh Govt. Aizawl College te hnenah a hlan nghal a. Higher Secondary School atangin Baptist HSS, Serkawn, Govt. Mizo HSS leh Govt. Chaltlang HSS ten an dawng bawk. Hemi lawmman atan hian Rs 2,00,000/-(Nuai hnih) hu thilpek hlu tak leh Citation Khuallian hian a hlan a ni. State Level NSS Award for 2019-2020 chu R. Lalrochama, NSS Programme Officer, Lunglei Govt. College leh Lalhmangaihzuala, NSS Volunteer Synod HSS te hnenah an hnathawh that hriatpui nan leh chawimawi nan Khuallian hian a hlan bawk a ni.

Pu F. Lalrinawma, Additional Secretary, SYS chu Khualzahawm niin NSS Mizoram Annual Report 2019-2020 a tlangzarh nghal a ni.

NSS Day lawmnaah hian Aizawl khawchhunga NSS unit hrang hrang 30 vel atangin NSS Programme Officers 50 vel an pung khawm a. Kum dangah chuan Vanapa Hall-ah ropui taka lawm thin a ni a, kuminah erawh chuan Covid -19 hrileng avangin mi tlemte chauh lawmnaah an tel a ni. He NSS Day lawmna programme hi Dr Benjamin L. Saitluanga, Programme Coordinator NSS Cell MZU-in kaihruaiin, Dr Zirlianngura, State NSS Officer cum DS NSS Cell Mizoramin NSS lo pian chhuah dan, a thil tum tlangpui te a sawi a, kum 2019-2020 chhunga NSS Mizoram activity pawimawh zualte a tar lang a ni.

He ni hi Mizoram pumah NSS unit hrang hrangten an lawm a. A thenin NSS Day lawm nan Thisen an pe, a thenin anmahni Institution leh vantlang hmun an tifai. A thenin Fit India Freedom Run te an lo buatsaih ve thung bawk. A then chu anmahni Plantation site-ah te kalin an tifai.

NSS hi kum 1969 September ni 24 (Mahatma Gandhi birth Centenary kum) ah din tan a ni a. A din tirhah chuan University leh State thlan bikah te chauh hawn a ni a, student enrolment pawh 40,000 (singli) chauh an ni thei a. Mahse zawi zawiin University leh State hrang hrangah an hawn belh zel a, tunah phei chuan NSS enrolment chu India ram pumah NSS volunteer hi nuai 40 lai an tling tawh a ni.
Mizoramah chuan Pachhunga University College-ah kum 1972 khan NSS hi din a ni. Chumi hnuah College hrang hrangah din belh zel a ni a. Kum 1996 atangin College-ah Pre- University (PU) awm tawh lovin, Higher Secondary School lamah an kal tak avangin, NSS pawh Higher Secondary School lamah din a lo ni ve leh ta zel a ni. Tunah hian Mizoram pumah NSS Unit awmna School leh College 90 lai kan lo nei ta reng a ni.
Vanneihthlak takin NSS hi Centrally Sponsored Scheme thin kha Centrally Sector Scheme-ah kum 2016 atangin thlak a ni a, Central sawrkarin 100% funding a rawn tum tawh a ni.

Kum 1988 atang khan Mizoram chuan Central duh dan angin, a hranin State NSS Cell kan lo nei ve ta a, State NSS Officer cum Deputy Secretary in a ho a, Nodal Department-ah Sports and Youth Services Department hman a ni.