No.4305/2021-2022

Aizawl the 17th March, 2022: Vawiin hian Beti Bachao Beti Padhao(BBBP) Implementation Unit, Serchhip chuan DC Conference Hall Serchhip ah Self Help Group member te tan Beti Bachao Beti Padhao inhrilhhriatna (Sensitization Training) an buatsaih.

He hunah hian Pi F. Lalnisai, MCS, SDC Serchhip, BBBP Nodal Officer chuan Beti Bachao Beti Padhao hmalakna chu sawrkar laipui flagship programme a nih thu leh fanute venhim leh zir puitlintir chu a thiltum ber a nih thu a sawi a. Serchhip district chhung hmun tina SHG memberte chu fanute dam khawchhuahna atana thawktu leh mipuitling an nih ngei theih nana zirtirtu ni tel tura an beisei thute; fanute venhim a tulzia mite hrilh hretu ni tura an beisei dante hrilhin, nu hote kan tanrual chuan kan fanuten nasa takin hma an sawn ngei ngei dawn a ni, a ti. Hri leng avangin an duh anga tam member an koh khawm ngam loh thu sawiin, a kal chhunte erawhin training hlawk taka an hman ngei a beisei tih a hrilh a ni.

VL Remruatpuii, District Coordinator, BBBP chuan, Serchhip district BBBP hmalak tawhna te leh hmachhawp an nei mekte sawifiahna a nei a. SHG member te hnena training an buatsaih chhan leh an thawhpuina an beisei dante a hrilhfiah a. Pu Denis V. Lalhlimpuia, Livelihood Coordinator, Mzsrlm pawhin SHG te pawimawhna leh hnathawh turte, an din chhan leh a thiltum hrang hrangte zirtirna a pe bawk.

He hun hi Sarah Lalbiakliani, District Coordinator, BBBP chuan a kaihruai a, Keitum khua atangin SHG member mi 20 an tel a ni.